Bankat, kushtet e reja për kreditë e shtëpive
Ndryshojnë aplikimet për të përfituar kredi të buta për shtëpi. Gazeta zbardh vendimin e bashkisë me kushtet e tri bankave për të marrë financimin
Ndryshojnë kriteret për të përfituar kredi për blerjen e një apartamenti me interes 3 për qind.
Për të gjithë të pastrehët që aplikojnë dhe përfitojnë nga programi i subvencionimit të kredive, pas filtrit të bashkisë do të duhet të kalojnë edhe atë të bankës. Por, ndryshe nga vitet e tjera, sivjet nuk do të jetë më vetëm një bankë kontraktore që vendos të lëvrojë apo jo fondin qytetarëve për blerjen e banesës, por tri të tilla. Nesër Këshilli Bashkiak pritet të miratojë vendimin në fjalë, që i hap dritën jeshile nisjes së aplikimeve dhe në fund të programit, lista me një mijë përfitues do të vijë për miratim në Këshill.
MARRËVESHJA ME
BANKËN Ndryshe nga vitet e mëparshme, programi i subvencionimit të kredive për shtëpi nuk do të realizohet vetëm nga bashkia, por në bashkëpunim me Ministrinë e Financave dhe Ekonomisë. Kjo e fundit ka përzgjedhur tri bankat që do të menaxhojnë projektin për kreditimin e familjeve, që përfitojnë banesë kundrejt një interesi 3%, pasi pjesa tjetër mbulohet nga qeveria. Në tabelën bashkëngjitur s h k r i m i t z b a r d h e n kushtet e kreditimit për të tria bankat e nivelit të dytë, duke përfshirë afatin maksimal të shlyerjes së kredisë që ofron secila prej tyre, shuma që disbursojnë dhe norma e interesit. Përpara se të bëjë përzgjedhjen e bankës, çdo individ këshillohet të marrë informacion në të tria, për të marrë ofertën më të mirë. Më i rëndësishëm është fakti që kontrata e kredisë që do të lidhë qytetari do të jetë e pandryshueshme në vite, 3%, ndërsa luhatjet mbi këtë normë interesi janë në ngarkim të buxhetit të shtetit. Por, edhe banka përzgjedh nga ana e saj. Mosha është treguesi kryesor. Shumatorja e moshës së çifteve të reja, që janë një ndër kategoritë e përfituesve potencialë, nuk duhet t’i kalojë shtatëdhjetë vjeç.
Faktori moshë lidhet direkt me kohën e shlyerjes së kredisë, që këtë vit vjen e zgjatur në kohë më shumë se kurrë. S’do të jenë më 20, as 25, por 30 dhe 35 vite kohë për të shlyer kredinë e apartamentit, që marrin përfituesit përmes këtij programi. Konkretisht, Banka Kombëtare Tregtare ofron afatin maksimal prej 420 muajsh dhe Intesa San Paolo dhe Raiffesien, për një periudhë 360- mujore. Veç kësaj, banka përcakton edhe shumën minimale të të ardhurave që duhet të ketë një familje që shpallet përfituese, për t’i dhënë këstin që i takon. Në tabelën ngjitur pasqyrohet vetëm niveli maksimal i të ardhurave, bazuar në të dhënat e konsumit nga Instituti i Statistikave, për çdo tipologji familjeje. Sipas të dhënave të bashkisë, Raiffeisen ofron kufirin minimal të të ardhurave më të ulëta, tregues ky që duhet marrë në konsideratë për familjet që janë shumë afër pragut jetik.
PËRFITIMI Miratimi i listës së emrave nga Këshilli Bashkiak nuk e bën automatikisht përfitues qytetarin. Bashkia, së bashku me Entin e Banesave do ta ndjekë procedurën deri në fund, duke bërë verifikimin e aftësinë përballuese të individëve mbështetur në të ardhurat që ka, me qëllim që ai të zgjedhë në treg për blerje me kredi, një banesë që u përshtatet kushteve specifike të tij. Banka nga ana tjetër bën vlerësimin për banesën e zgjedhur dhe aftësinë për ta përballuar shlyerjen e kësteve të kredisë nga përfituesi, mbështetur në programin e subvencionimit të interesave të kredisë.