Antishpifja, ‘ Venecia’ dëgjon variantet e palëve
Murrizi: Me kaq shumë vizita, më mirë hapni zyrë në Shqipëri
Dje, delegacioni i Komisionit të Venecias nisi vizitën e tij dyditore në Shqipëri në kuadër të konsultimeve për paketën “Antishpifje”. Kjo e fundit është dërguar në Komisionin e Venecias nga KiE dhe OSBE për një opinion dhe për këtë shkak, pjesëtarët e delegacionit mbërritën në Tiranë për të dëgjuar qëndrimet e palëve në pole të kundërta. Takimin e parë, delegacioni e zhvilloi me nënkryetaren e Parlamentit, Vasilika Hysin. Më pas, u zhvilluan tri takime të tjera, me përfaqësues të Grupit Parlamentar të PS- së, atij opozitar dhe me Komisionin e Medias. Të gjitha takimet u zhvilluan pa praninë e medieve, por zyra e shtypit në Kuvend bëri me dije se gjatë takimit me Hysin, komisionerët kërkuan të dinë më shumë rreth këtij ligji dhe nevojës që ka Shqipëria për të.
Ndërkohë, në takimin me përfaqësuesit e grupimit parlamentar në Kuvend, deputeti Myslim Murrizi nuk e kurseu ironinë, duke marrë shkas nga vizitat e shumta të këtij delegacioni në vendin tonë në vitet e fundit. “Me kaq shumë vizita sa keni bërë në Shqipëri, unë do t’iu kërkoja të hapnit një zyrë në Shqipëri. Nuk duhet të habiteni, pasi shumë shpejtë mund të vijë në Komisionin e Venecias edhe ligji për zgjedhjet, që është duke u punuar”, u shpreh ndër të tjera, Murrizi në fillim të fjalës së tij përballë delegacionit nga Komisioni i Venecias. Gjithashtu, deputeti tjetër opozitar, Ralf Gjoni, konfirmoi për “Panorama” se në takim, anëtarëve të delegacionit nga ana e opozitarëve iu paraqitën shqetësimet reale që përcjellë kjo nismë ligjore e maxhorancës. Gjoni tha se u shprehën shqetësime për rritjen e rrezikut të arbitraritetit që mund të përcjellë kjo paketë ligjore që ka paraqitur maxhoranca socialiste. Delegacioni i misionit faktmbledhës nga Komisioni i Venecias do ta vijojë vizitën e tij në Shqipëri edhe sot, ku në axhendë janë edhe disa takime të tjera. Delegacioni pritet të takohet me përfaqësues nga Këshilli i Ministrave, që është edhe institucioni propozues i këtij ligji, por edhe me Presidencën, që kundërshtoi. Ky i fundit ishte ai që e ktheu për rishqyrtim në Kuvend të gjithë paketën me të dyja ligjet, por që maxhoranca mori parasysh vetëm ligjin për AMA, ndërsa dekretin për AKEP e rrëzoi, duke i hapur kështu rrugën hyrjes në fuqi të ligjit. Pas misionit të Delegacionit, Komisioni i Venecias do të hartojë një dokument që pritet të bëhet publik mes datave 20 dhe 21 mars.