Koronavirusi, shënohet viktima e dytë në Itali, 76 të prekur
Rëndohet bilanci, shkon në 2240 numri i personave që kanë ndërruar jetë
Mbi 2240 persona kanë ndër ruar jetë në Kinë dhe mbi 75 600 raportohet numri i të in fektuarve nga Koronavirusi. Frika dhe pasiguria nga virusi vdekjeprurës është shtuar, nisur edhe nga situata në vendet fqinje. Të premten u raportua për një rast të prekur me Koronavirus në Mal të zi, ndërsa në Itali ka shkuar në 76 numri i të prekurve. Kjo ka bërë që Ministria e Shëndetësisë të mbledhë mëngjesin e së shtunës Task- Forcën për masa shtesë, ndonëse deri dje thuhej se rreziku ishte i ulët. Pas diskutimeve mes ekspertëve dhe drejtuesve të institucioneve, u vendos përforcimi i masave në pikat kufitare, sigurimi i sasisë së shtuar të mjeteve të mbrojtjes personale dhe përforcimi i gjurmimit të rasteve për të rritur kontrollin për parandalimin e depërtimit të Koronavirusit. Task- Forca vendosi që masa e paracaktuar për vetëkarantinim të personave që vijnë nga vende me shpërthime komunitare të virusit, duhet të vijojë. Nga ana tjetër, Instituti i Shëndetit Publik në koordinim me Inspektoratin Shëndetësor Shtetëror, Autoritetin Portual në Durrës dhe Operatorin shëndetësor ka përgatitur dhe vënë në zbatim listën e pyetjeve mbi kontrollin e udhëtarëve, për rastet e dyshimta me sëmundje infektive ( për të evidentuar specifikisht COVID - 2019) për çdo pikë kufitare të të gjitha niveleve tokësore, detare dhe ajrore; ku merren të dhënat e sakta në të njëjtën kohë mbi vendbanimin, vendnisjen e udhëtimit dhe transitit, por edhe të dhëna klinike mbi infeksionin respirator apo shenja klinike me mbizotërim të temperaturës dhe rrufës. Për qytetarët që kanë udhëtuar në vendet e prekura, MSH nuk sugjeron spitalin për ndihmën e parë, por telefonimin e urgjencës, e cila do t'i adresojë në vendin e duhur. "Ministria e Shëndetësisë dhe Mbrojtjes Sociale dhe Task- Forca për parandalimin e depërtimit dhe përhapjes së Koronavirusit të ri, REKOMANDON të gjithë qytetarët që kanë udhëtuar nga vendet e prekura, të telefonojnë në numrin e Urgjencës Kombëtare 127, në rast të shfaqjes së çdo shqetësimi apo shenje klinike, pa u drejtuar menjëherë në spital". Për çdo rast, Ministria e Shëndetësisë, tashmë ka gati vendin e karantinës, që do të jetë një strukturë spitalore.