Partitë në Maqedoni, në kërkim të koalicioneve me shqiptarët KOALICIONET MES SHQIPTARËVE
Për koalicionet ka folur edhe lideri i PDSH- së, Menduh Thaçi. Ai tha se partia e tij mund të futet në koalicion parazgjedhor me RDK- në e Vesel Memedit. Thaçi përjashtoi mundësinë e koalicionit me Besën, pasi sipas tij, BESA nuk ka forcë politike, ndërkohë tha se gjasat janë të vogla për ndonjë koalicion me partitë maqedonase. Dje Aleanca për Shqiptarët dhe Alternativa, zyrtarisht firmosën koalicionin parazgjedhor.
Për zgjedhjet e jashtëzakonshme të 12 prillit, partitë në Maqedoninë e Veriut janë duke diskutuar për koalicionet zgjedhore, ku partitë shqiptare janë një faktor i rëndësishëm i kërkuar nga të dyja polet e mëdha kundërshtare. VMRO- DMPNE është në bisedime me disa parti për koalicion të mundshëm parazgjedhor. Sipas burimeve të TV21, ajo gjithashtu po negocion edhe me parti shqiptare. I pyetur për negociata të mundshme në mes VMRO- DPMNE- së dhe Lëvizjes Besa, Hristijan Mickoski tha se ndoshta edhe mund të ketë. "Secila parti ka të drejtën e strategjisë edhe në komunikim me publikun, edhe me partitë politike. Nëse ashtu ka thënë sekretari i përgjithshëm i Lëvizjes Besa, e lëmë në
ndërgjegjen e tij të tregojë nëse ajo është ose nuk është e vërtetë. Kështu që, nuk kam çfarë të shtoj ose të heq nga ajo që ju më pyetët. Do të mbes në atë që e ka thënë z. Janushev", tha Mickoski.
Një ditë më parë, Arjanit Hoxha, sekretar i përgjithshëm i
Lëvizjes Besa e mohoi një gjë të tillë. Edhe nga partia e tij thonë se nuk kanë biseduar asnjëherë me VMRO- DPMNE- në.
Lideri i LSDM- së, Zoran Zaev, shpreson të gjejë forcën për të bërë një koalicion parazgjedhor me partitë nga blloku shqiptar. "Me BDI- në i kemi zgjidhur çështjet kryesore në qeveri, projekti një shoqëri për të gjithë, Marrëveshja e Ohrit, Marrëveshjet me Bullgarinë dhe Greqinë, bashkë me partnerët shqiptarë të opozitës. Ne jemi e vetmja parti që kemi një zgjedhje të shkëlqyeshme për bashkëpunim me partitë shqiptare, kështu që pres që do të gjejmë forcën për të bërë një koalicion parazgjedhor me partitë nga blloku shqiptar për herë të parë", tha Zaev. Nga BDIja edhe një herë thanë se nuk bëjnë partneritete paraprake dhe se nuk kanë konkurrencë në spektrin politik shqiptar. "BDI është në partneritet vetëm me qytetarët e MV- së, veçanërisht me qytetarët shqiptarë. Dhe pikërisht qytetarët do të vendosin për të ardhmen e BDI- së", tha një zëdhënës i kësaj partie.