NIS FAZA E DYTE
Shtëpi me kredi të butë, kushtet për të qenë fitues Dokumentet që duhet të plotësohen për fazën e dytë. Aplikimet e hapura deri në 17 mars, ja gabimet që nuk duhet të bëni për të qenë fitues
I gjithë informacioni i dhënë në formularin e aplikimit për kredi të butë gjatë fazës së parë, do të duhet të vërtetohet me dokumentacionin përkatës në fazën e dytë të aplikimeve.
Gazeta disponon listën e plotë të atyre që kërkohen, për çdo rast specifik që kërkon të përfitojë nga programi. Marrëdhënia e punës ( e detyrueshme për aplikim) e bën të vështirë mbledhjen në kohë të të gjithë dokumentacionit të duhur për aplikantët, ndaj këshillohet që kjo gjë të nisë sa më parë, sipas tabelës përbri shkrimit. Aplikimet janë hapur përpara një jave dhe janë të hapura deri më 17 mars. Në këtë fazë, mjafton të jesh mbi 18 vjeç, pa shtëpi në pronësi dhe në marrëdhënie pune për t'u kualifikuar. Pas kësaj, të gjithë qytetarët futen në sitën e detajuar të Komisionit të strehimit në Bashki, që kërkon përveç të tjerash edhe kohë në mbledhjen e dokumentacionit, i cili nuk gjendet i gjithi në portalin e qeverisë e- albania. E gjithë procedura, me gjithë shqyrtimin e dosjeve pritet të mbyllet në muajin qershor.
KUSHTET SPECIFIKE
Kushtet e strehimit, ato familjare, sociale dhe ekonomike do të duhet të vërtetojnë që një familje në Tiranë meriton të marrë shumën që varion nga 4.4 deri në 7.5 milionë lekë, në varësi të anëtarëve të familjes dhe strukturës së apartamentit që dëshiron të blejë. Për të vërtetuar se plotëson kushtin e parë, atë për strehimin, së pari nevojitet një akt nga zyra e regjistrimit të pasurive të paluajtshme për çdo anëtar të familjes që nuk kanë banesë në pronësi. Por nuk është kaq e lehtë. Aplikuesit, as nuk duhet të kenë pasur pronë në 5- vjeçarin e fundit. Për raste specifike, si ata që preken nga fatkeqësitë natyrore apo janë në rrezik shembjeje, ndryshon çështja. Për të vërtetuar kushtet familjare, mjafton certifikata në gjendje civile. Nënat që kanë fëmijë në ngarkim dhe hyjnë në kategoritë potenciale për ta përfituar kredinë, duhet të kenë dhe vendimin e gjykatës për fëmijën/ t në ngarkim. Në kategorinë e kushteve sociale nevojiten disa të dhëna. Për ata me aftësi të kufizuara dhe jetimët, raporti përkatës. Emigrantët e kthyer, azilkërkuesit apo punëtorët emigrantë kanë përparësi. Si të tillë, do të duhet të kenë dokumentin nga institucionet përkatëse shtetërore. Pakicat kombëtare, vajzat kryefamiljare dhe ata të LGBT duhet të vetëdeklarojnë. Në listën e kushteve ekonomike nuk mjafton që aplikanti të vërtetojë se të ardhurat familjarë ndodhen midis kufirit të të ardhurave minimale e maksimale që kanë përcaktuar bankat. Të papunët në familje duhet të kenë vërtetim nga zyra e punësimit që janë trajtuar si të tillë, të vetëpunësuarit deklarimin nga Tatim Taksat për hedhjen e kontributeve.
PËRZGJEDHJA
Për të gjithë treguesit e mësipërm ka një sistem pikëzimi, mbi bazën e të cilëve vendosen ata më prioritarët. Në të katërtin vit të zbatimit të programit, prioritet i bashkisë vijojnë të jenë çiftet e reja ( shumatorja e moshës së të cilëve nuk i kalon të shtatëdhjetat) duke qenë se janë më të shumtët në numër, si dhe shikohen si potenciale për të paguar gjithë kohëzgjatjen e kredisë. Po ashtu janë dhe nënat kryefamiljare dhe grupet e margjinalizuara si romët dhe egjiptianët, të cilëve u është dhënë prioritet. Ata vlerësohen me më tepër pikë, pra kanë më tepër shanse për të qenë në listën e fituesve. Për të aplikuar, bashkia vendos kushtet e saj, me qëllim për të përzgjedhur ata që realisht kanë nevojë dhe meritojnë të jenë pjesë e skemës. Aktualisht, duhet të kesh jo më pak se 31 mijë lekë dhe jo më shumë se 115 mijë lekë të ardhura në familje. Nga ana tjetër, banka ka të tjera kritere, pasi kërkon të sigurohet që familja ka aftësinë përballuese për shlyerjen e kësteve. Banka sigurohet që përfituesi të blejë në treg një banesë, vlera e së cilës mbulohet deri në 85% nga kredia dhe pjesa tjetër duhet të sigurohet nga familja. Periudha e shlyerjes së kredisë do të jetë për 35 vjet maksimalisht, përveç rasteve kur përfituesi do të dojë ta shkurtojë këtë kohëzgjatje.