Nishani: Vrasjet, lojëra fëmijësh përballë këtij krimi
“Shqipëria, e dyta në Europë për vdekjet nga kanceri i aparatit të frymëmarrjes ”
Lajmi për zbulimin e ngarkesës me lëndë të dyshuar si kanecrogjene në Portin e Vlorës ka sjellë reagimin e Partisë Demokratike. I pari që reagoi ishte ish- Presidenti, Bujar Nishani, i cili përmes një postimi në rrjetet sociale, e cilësoi këtë gjë shumë të rrezikshme. Sipas tij, trafiku i drogës dhe vrasjet mafioze janë si lojëra fëmijësh përballë këtij lloj krimi që prek gjithë masën e qytetarëve dhe mosreagimi i qeverisë, e bën gjendjen edhe më të rëndë. "Një krim i rëndë kundër jetës dhe shëndetit të shqiptarëve e fëmijëve të tyre ka dalë rastësisht në dritë. Trafikimi dhe depozitimi në territorin e vendit tonë të lëndëve kancerogjene nga vendet e tjera konfirmon pushtetin e mafias dhe krimit të organizuar në Shqipëri. Trafiku i drogës dhe vrasjet mes bandave të krimit duken si diletantizëm përballë trafikut dhe hedhjes mes shqiptarëve të helmeve kancerogjene, duke e kthyer Shqipërinë në një gropë vdekjeprurëse për shqiptarët. Tashmë këto ditë doli në dritë nga media një rast që besoj se është një pikë uji në det, nga sjellja dhe depozitimi në Shqipëri i mbetjeve kancerogjene.
Tentativa për ta varrosur këtë skandal të përmasave jetësore është po aq kriminale sa dhe hedhja e atyre mbetjeve në frymën, gjakun dhe ushqimin e shqiptarëve. Media hesht, e ashtuquajtura shoqëri civile është zhdukur në drejtim të paditur, intelektualët e mbetur fshihen të tromaksur. Ata heshtin, kur në fakt duhet ulëritur. Ndërkohë, çdo ditë, muaj e vit, ndotja bëhet më vrasëse ndaj të gjithë neve, ndaj familjeve e fëmijëve tanë. Vdekjet e shqiptarëve nga ndotja e mjedisit janë bërë të frikshme me rritje galopante. Në Shqipëri, vdekjet nga ndotja rezultojnë të jenë dy herë më të larta se në Europë", shkroi Nishani. Më tej, ai publikoi disa të dhëna të rënda për numrin e lartë të të prekurve nga sëmundjet kancerogjene në vendin tonë në vitet e fundit dhe sipas tij një nga shkaktarët kryesorë janë edhe këto mbetje që depozitohen në mënyrë mafioze. "Shqipëria renditet e dyta për peshën më të lartë të vdekjeve të shkaktuara nga kanceri i aparatit të frymëmarrjes në Europë. Trafikimi dhe depozitimi i mbetjeve kancerogjene në Shqipëri përbën jo vetëm një krim ndaj mjedisit, por dhe një krim ndaj njeriut. Shqiptarët, përveçse po i përzënë nga vendi i tyre, edhe po i vrasin në vendin e tyre. Trafikimi dhe depozitimi në Shqipëri i mbetjeve kancerogjene është një fakt i shtuar, pse mafia ndërkombëtare financon dhe lobon pa pushim për mbajtjen në pushtet në forma dhe metoda fashiste të qeverisjes së rilindjes", tha Nishani. Pas këtij reagimi të Nishanit, Partia Demokratike publikoi disa deklarata të Ramës kundër mbetjeve, duke theksuar që edhe për këtë çështje ai ka gënjyer.