Basha mbështet Presidentin për Kushtetuesen, Meta: 2 marsi, referendum ndaj puçistëve
“Si qytetarë duhet t’i përgjigjemi çdo thirrjeje në mbrojtje të Kushtetutës”
Kryetari i Partisë Demokratike, Lulzim Basha, ka konfirmuar se mbështet thirrjen e Presidentit Ilir Meta për të dalë në shesh më 2 mars, për besëlidhjen, për të mbrojtur Kushtetutën.
Në një postim në “Facebook”, kreu i selisë blu përforcoi akuzat ndaj kreut të qeverisë Edi Rama se po kapë të gjitha institucionet e drejtësisë, përfshirë edhe Gjykatën Kushtetuese. “Shqipëria gjendet në një krizë të thellë kushtetuese, krahas krizës ekonomike që të gjithë shqiptarët e përjetojnë përditë. Si qytetarë, nuk mund të mbyllim sytë kur shteti ligjor merret peng, kur institucionet shkatërrohen dhe demokracia është në rrezik. Kapja e Gjykatës Kushtetuese do të thotë asgjësim i të drejtave dhe lirive të çdo qytetari. Ne nuk mund të pranojmë që Shqipëria të kthehet 30 vite prapa”, shkroi Basha. Kreu i selisë blu sqaroi se ai mbështet thirrjen e Presidentit si qytetar për të mbrojtur demokracinë. “Thirrja e Presidentit nuk është për partitë politike ose për të djathtët apo të majtët, por për qytetarët shqiptarë, që të mbrojnë themelin e demokracisë që është Kushtetuta. Si qytetarë që duam që vendi të bëjë hapa para drejt konsolidimit të demokracisë, duhet t’i përgjigjemi çdo thirrje në mbrojtje të Kushtetutës dhe funksionimin demokratik të institucioneve të pavarura. Prandaj, unë e mbështes tubimin e thirrur nga Presidenti për Kushtetutën”, vijoi Basha. Për të konfirmuar se mbështetja ndaj thirrjes së Presidentin nuk nënkupton rrëzimin e kësaj qeverie me dhunë, kryedemokrati thekson në statusin e tij se vendi ka nevojë për zgjedhje të parakohshme, në mënyrë që qytetarët të zgjedhin të lirë drejtuesit e tyre lokalë. “Duhet ta kujtojmë gjithmonë se sovrani është populli. Dhe ushtrimi më i lartë i këtij pushteti është të largojmë me zgjedhje të lira e të ndershme këtë qeveri të dështuar. Kudo ku shkoj dhe këdo që takoj, kërkesa kryesore e qytetarëve është të kenë një qeveri të zgjedhur prej tyre dhe që kujdeset për ta, që i dëgjon dhe që është e ndershme me ta. Unë dhe opozita kemi qenë dhe jemi fare të qartë: Kushtetuta ka zgjidhje demokratike: përfundimi në kohë i Reformës Zgjedhore dhe menjëherë mbajtja e zgjedhjeve të lira e të ndershme”, shkroi Basha. E ndërsa gjithnjë e më shumë data 15 mars po shihet si një datë ambicioze për përfundimin e Reformës Zgjedhore, Basha shkruan se opozita po punon çdo ditë për ta mbyllur në kohë.