Lojërat e fatit, Gjykata lë në burg 16 të arrestuarit
Në detyrim paraqitjeje dhe arrest shtëpie u lanë 14 të arrestuar
Gjykata e Tiranës vlerësoi dje të ligjshëm arrestimin e 30 të arrestuarve në kuadër të operacionit kundër lojërave të fatit, që u zhvillua tri ditë më parë.
Seanca u zhvillua me dyer të mbyllura, ndërsa Prokuroria kërkoi "Arrest në burg" për një pjesë të tyre. Masa e sigurisë u zhvillua e ndarë, pasi për pjesën tjetër do të jepet gjatë ditës së sotme. 16 persona u lanë në burg, 9 prej tyre në masën e sigurisë "Detyrim paraqitjeje" dhe 5 të tjerë në "Arrest shtëpie". Prokuroria paraqiti para Gjykatës një sërë provash, ndërsa operacioni për dokumentimin e veprimtarisë së jashtëligjshme kishte nisur që para 7 muajsh. Zyrtarisht Policia tha se janë kryer hetime me metoda të posaçme hetimi, si përgjime dhe vëzhgime, ndërsa finalizimi është bërë gjatë ndeshjeve të Europa Leage, për të bërë të mundur kapjen në flagrancë të personave. Nga hetimet ka rezultuar se pika kryesore e basteve ishte në Tiranë dhe ajo monitoronte pikat e tjera ku ushtrohej aktiviteti. Bastet vendoseshin nëpërmjet llogarive të hapura në pikat e basteve jashtë vendit, por jo vetëm. Sipas hetimeve, një person me anë të llogarive vendoste baste online për persona të tjerë.
HETIMET
Hetimet për këtë dosje kanë nisur në vitin 2019, pas informacioneve të dhëna nga qytetarë në Policinë e Shtetit. Kjo e fundit ka referuar materialet në Prokurori, ku është regjistruar procedimi penal dhe është kryer hetim me metoda speciale, si përgjime dhe vëzhgime. Hetimet u shtrinë më pas në disa qytete të vendit dhe është dokumentuar sipas Policisë në 7 prej tyre. "Bazuar në informacionet e marra në rrugë operative dhe nga informacionet e adresuara nga qytetarët në adresat zyrtare të Policisë së Shtetit, për ushtrimin dhe organizimin e lotarive dhe basteve sportive pa leje, vënien në dispozicion të lokaleve për lojëra fati, fshehje të ardhurash dhe pastrim të produktit të veprës penale, Drejtoria Vendore e Policisë Tiranë regjistroi në
Prokurorinë e Rrethit Gjyqësor Tiranë procedimin penal nr. 5431 të vitit 2019. Pas një pune procedurale dhe hetimore, duke aplikuar format dhe metodat speciale të hetimit, u arrit të dokumentohej aktiviteti kriminal në Tiranë, Durrës, Elbasan, Fier, Berat, Korçë, Lezhë e Shkodër", shkruhet në njoftim.
ARRESTIMET
Gjatë operacionit për arrestimin e personave të implikuar në këtë veprimtari morën pjesë 1540 forca policore dhe u krye njëkohësisht në 7 qytete. Prokuroria e Tiranës kishte marrë urdhërkontrolle në Gjykatë për shumë ambiente, ky dyshohej se ushtrohej aktiviteti kriminal. "Në këtë kuadër u organizua operacioni policor i koduar ' Fati i lojërave', i cili u zhvillua në të njëjtën kohë në të 8 qarqet e sipërpërmendura, nën drejtimin e drejtorit të përgjithshëm të Policisë së Shtetit. Gjatë operacionit, i cili u zhvillua në kohën e zhvillimit të ndeshjeve të futbollit të Europa League, u përfshinë 1540 forca policore nga Departamenti i Policisë Kriminale, Departamenti për Sigurinë Publike, Drejtoritë Vendore të Policisë Tiranë, Durrës, Berat, Fier, Korçë, Elbasan, Lezhë, Shkodër dhe FNSHtë Tiranë, Fier e Shkodër. Në Tiranë dhe në qarqe u ushtruan 486 kontrolle në lokale dhe ambiente, ku dyshohej se zhvillohej kjo veprimtari kriminale", shkruhet në njoftim.