Masat për parandalimin e Koronavirusit
“Nga larja e duarve, te mosmarrja e antibiotikëve”
Koronarvirusi shfaq të njëjtat simptoma sikurse edhe gripi, duke filluar nga temperatura e lartë, ethet, vështirësi në frymëmarrje, dhimbje muskulore etj. Në situatën kur virusi vdekjeprurës është duke u përhapur me shpejtësi, Organizata Botërore e Shëndetësisë ka apeluar për respektim të kushteve higjieno- sanitare. Rregullat për parandalim përfshijnë larjen e duarve shpesh përgjatë ditës, shmangien e kontakteve me personat e prekur nga infeksionet respiratore akute, përdorimin e maskave, shmangien e përdorimit të antibiotikëve dhe më e rëndësishmja është që kur të vëreni një nga shenjat e mësipërme, të mos paraqiteni në urgjencë, por të telefononi në numrin 127. "Në rastin e kushteve të tilla, pacientët me simptoma të lehta dhe pa mbivendosje me situata të tjera kronike, si sëmundje mushkërish apo zemre, problem me veshkat apo me të dhëna komprometuese të sistemit imunitar, që e vendosin atë në një rrezik të shtuar për të zhvilluar komplikacione, mund të trajtohet në ambientin e shtëpisë", apelon ISHP- ja. Koronaviruset ( CoV) janë një familje e madhe virusesh, që shkaktojnë sëmundje nga më të lehtat deri tek ato tepër të rënda. Ndër format më të zakonshme për marrjen e Koronavirusit janë nëpërmjet kollitjes dhe teshtimave. Stërkalat, kontaminimi i sendeve apo objekteve prej tyre konsiderohen sipas mjekëve rrugët kryesore të transmetimit të virusit, ndaj edhe në çdo rast të dyshuar, pyetja e parë që i bëhet është nëse ka udhëtuar në Kinë apo ka pasur kontakt me një person që ka ardhur prej andej. Kjo hedh poshtë edhe lajmet që kanë qarkulluar jo pak në rrjetet sociale këto ditë, duke ngjallur panik te qytetarët, mbi rrezikun e infektimit nga mallrat apo produktet që vijnë nga Kina. "Duke qenë se prek rrugët respiratore, frika është gjithmonë nga stërkalat që shpërndan një pacient i infektuar nëpërmjet kollitjes apo teshtimave. Sigurisht që nëpërmjet kollitjes dhe teshtimave, ai mund të infektojë edhe sipërfaqe të ndryshme, siç janë tavolinat, dorezat e dyerve etj. Edhe nëse ka vendosur dorën para gojës dhe ka teshtirë apo kollitur dhe me duart ka prekur objekte që mund të prekim edhe ne, po ashtu është një rrugë transmetimi. Sa kohë që rrugët e transmetimit mbeten këto, përjashtohen rrugët e tjera. Deri tani, të tilla mallra apo produkte nuk mund të quhen objekte të kontaminuara nga stërkalat dhe se virusi vetë nuk mund të mbijetojë për një kohë të gjatë", ka pohuar më herë mjekja infeksioniste Entela Kolovani.