Rama: Jemi gati për ta përballuar Koronavirusin
"Mos bini pre e lajmeve të rreme, se shteti shqiptar po e bën detyrën"
Duke shpërndarë deklaratën e mjekes Silva Bino, Kryeministri Rama ka shuar çdo aludim se deri më tani mund të ketë të infektuar me Koronavirus në Shqipëri.
Sipas Kryeministrit, virusi nuk ka mbërritur në vendin tonë dhe nuk ka as të dyshuar, por rreziku potencial, si për të gjithë botën, është i pranishëm. "Koronavirusi nuk e ka prekur Shqipërinë! Por si për gjithë botën është një kërcënim potencial, për të cilin janë marrë të gjitha masat, në rast se do të na duhet ta përballim", sqaroi Kryeministri. Por, ashtu si në rastin e tërmetit dhe panikut që u krijua të qytetarët, edhe këtë herë, Rama ka bërë apel që të mos përhapen lajme të rreme. Duke i cilësuar si gojëligësi, Rama thotë se janë të njëjtët njerëz që ngjallën panik te qytetarët pas tërmetit të 26 nëntorit. "Të njëjtat mendje të shthurura, që ju shqetësuan keq me lajmet false dhe me gojëligsinë e tyre gjatë ditëve e netëve të gjata pas tërmetit, janë në veprim", shprehet Kryeministri, Edi Rama. Kreu i qeverisë garanton me tej se të gjitha instancat shtetërore janë në gatishmëri të plotë për t'i bërë ballë një situate të mundshme nëse virusi i rrezikshëm do të shfaqet në Shqipëri. Ai shton se gatishmëria është në nivele të larta dhe me profesionalizëm. "Mos bini pre e tyre dhe jini të sigurt se shteti shqiptar po e bën prej kohësh detyrën për të qenë gati në rast shfaqjeje të Koronavirusit, të cilin jemi të gatshëm ta përballim me organizim dhe profesionalizëm të lartë", saktëson kreu i qeverisë, Rama. Ky është reagimi i parë i Kryeministrit në lidhje me këtë çështje. Gjendja e ankthit dhe alarmit u rrit akoma dhe më tepër te qytetarët pas rasteve të shtuara në Itali dhe disa viktimave në moshë të thyer, të cilët duhet theksuar se vuanin edhe nga sëmundje të tjera kronike. Gjithashtu, më herët, edhe ministrja e Shëndetësisë, Ogerta Manastirliu, ka garantuar se janë bërë të gjitha përgatitjet e nevojshme për përballimin e situatës, nëse në Shqipëri do të evidentohet ndonjë rast me Koronavirus.