"Spitali i Kavajës, karantinë për koronavirusin"
Bardhi: Kërcënim serioz për jetën e të gjithë banorëve
Spitali i Kavajës do kthehet në karantinë për të sëmurët e mundshëm me koronavirus. Vendimi është denoncuar dje nga sekretari i përgjithshëm i PD- së. Zyrtarë të qeverisë nuk kanë pranuar publikisht të tregojnë se kush është zona apo ndërtesa e vendosur si karantinë për të sëmurët e mundshëm me koronavirus. Gjetja e vendit ku do të bëhet karantina, pra izolimi i të sëmurëve që do trajtohen me koronavirus, është e ndryshme sipas vendeve. Zakonisht janë ambiente të veçanta, që transformohen nga autoritetet në zona karantine. Në Kinë u ndërtua një spital i posaçëm brenda pak kohësh për të pritur të sëmurët. Ndërsa në vende të tjera përdoren edhe ambiente brenda spitaleve ekzistuese, por duhet të jenë super të izoluara, në mënyrë që virusi të mos prekë të sëmurët apo banorët e tjerë. Kjo është arsyeja që këshillohet fort që të dyshuarit si të infektuar, të mos shkojnë në ambientet e spitaleve, por të telefonojnë dhe të jenë mjekët që shkojnë në shtëpi për të vendosur si do të jetë kura.
AKUZA E BARDHIT "Sot ( dje) në repartin e Patologjisë dhe Urgjencës në Spitalin e Kavajës kanë nisur përgatitjet, me urdhër të ministres së Shëndetësisë, për ta kthyer në karantinë. Kjo është papërgjegjshmëri! Zgjedhja e një spitali të një qendre të banuar për karantinë është kërcënim serioz për jetën e të gjithë banorëve. Ky është një provokim i rëndë me Kavajën. U bëj thirrje të gjithë bashkëqytetarëve të mi të mos e pranojnë trajtimin nga Edi Rama si banorë të parëndësishëm, jeta e të cilëve nuk ka rëndësi për Kryeministrin. Karantinën ta ndërtojë në shtëpinë e tij në Surrel, jo në Kavajë".