Cakaj: Asnjë shqiptar në Itali i prekur nga virusi
"Kemi marrë masa për mospërhapjen e virusit në Shqipëri"
Rastet e shumta të konstatuara me virusin "Korona" në Itali kanë ndezur alarmin në Shqipëri, duke pasur parasysh volumin e parë të qarkullimit mes dy vendeve. Për të qetësuar këtë situatë, ministri i Jashtëm në Detyrë, Gent Cakaj, deklaroi dje se nuk ka asnjë rast të shtetasve shqiptarë, që të jenë infektuar më këtë virus. Në reagimin e tij përmes rrjeteve sociale, Cakaj shkruan se dikasteri që ai drejton, është në kontakt të vazhdueshëm me homologët italianë dhe selitë diplomatike të vendit tonë në Itali për të mbajtur nën kontroll gjithë situatën. "Ministria për Europën dhe Punët e Jashtme, së bashku me Ambasadën e Republikës së Shqipërisë në Itali dhe Konsullatat e Përgjithshme në Milano dhe në Bari janë duke ndjekur nga afër situatën e emergjencës së krijuar nga përhapja e Koronavirusit Covid19 në disa rajone të Italisë. Deri më tani nuk ka informacione për qytetarë shqiptarë të prekur. Informacioni mbi identitetin e të prekurve mbetet i rezervuar në bazë të normativës europiane për mbrojtjen e të dhënave personale. Ministria për Europën dhe Punët e Jashtme dhe Ambasada e Shqipërisë në Itali është në kontakt të vazhdueshëm me Ministrinë e Shëndetësisë së Shqipërisë, Ministrinë e Shëndetësisë të Italisë dhe me Departamentin e Emergjencave Civile të Këshillit të Ministrave të Italisë për masat e përbashkëta për parandalimin e përhapjes së virusit në territorin shqiptar", shkroi ministri i Jashtëm në Detyrë,
Gent Cakaj, përmes rrjetet sociale, dje. Gjithashtu, në këtë reagim, ai saktësoi mënyra e kontaktit për të gjithë shqiptarët që duan ndihmë, duke iu bërë atyre apel që të kontaktojnë në numrat e emergjencës që janë vënë në dispozicion nga emergjencat italiane. "Ne iu bëjmë thirrje qytetarëve shqiptarë në Itali dhe atyre që udhëtojnë për dhe nëpër Itali t'iu përmbahen masave të përcaktuara prej autoriteteve italiane në situatën e emergjencës. Ministria për Europën dhe Punët e Jashtme dhe Ambasada e Shqipërisë në Itali do të vijojnë informimin e publikut varësisht prej situatës", përfundoi reagimin e tij ministri Cakaj.