Ku ndryshon koronavirus nga SARS
Ja si janë shpërndarë në botë viruset me simptoma akute frymëmarrjeje
Shpërthimi i koronavirusit në Itali ka krijuar shqetësim edhe për vendet fqinje.
Deri tani Shqipëria nuk ka konfirmuar asnjë rast me koronavirus dhe me sa ka treguar historia e epidemive të ngjashme të viteve të fundit, Shqipëria ka "shpëtuar" nga prekja. Në një krahasim të përhapjes dhe rasteve të koronavirusit me viruse të tjera të rrezikshme, si Sars, Ebola, apo H1N1, të cilat kanë pothuajse të njëjtat simptoma, me rrezikun e bllokimit të frymëmarrjes, temperaturë të lartë apo ethe, koronavirusi rezulton më e rrezikshme se SARS, që sërish e pati zanafillën në Kinë. Studiuesit në "London School of Hygiene & Tropical Medicine" kanë krijuar një mjet të ri hartografie që krahason koronavirusin ose COVID- 19, me epidemitë e tjera të kohëve të fundit. Pandemia e gripit të derrit të vitit 2009 u gjet në më shumë se 18 vende, por kishte një vdekshmëri më të vogël se 0.1 për qind, ose midis 123,000 dhe 203,000 vdekjeve. Aktualisht, COVID- 19 është gjetur në 29 vende dhe ka infektuar më shumë se 78,915 raste. Nga vendet europiane janë prekur deri tani Italia, Gjermania, Franca, Britania e Madhe, Belgjika, Spanja, Suedia dhe Finlanda. Sipas studiuesve, kulmi i këtij virusi do të shënohet në mes deri në fund të shkurtit nëse vazhdojnë tendencat aktuale. Ka një shkallë vdekshmërie të vlerësuar në rreth 2 për qind, duke shkaktuar dhe 2,462 të vdekur deri mbrëmjen e së dielës. Kjo përhapje virusale, krahasohet me shpërthimin e SARS në vitin 2003, i cili u shkaktua nga një lloj koronavirusi dhe preku 26 vende, duke infektuar 8,096 njerëz. Shkalla e vdekshmërisë së SARS ishte 10 për qind. Edhe ky virus e kishte zanafillën në Kinë, ku u shënuan 5,327 të prekur me 349 të vdekur. I dyti nga vdekshmëria ishte Hong Kongu, me 1,755 të prekur dhe 299 të vdekur. Në Tajvan kishte 346 të prekur dhe 37 të vdekur, në Vietnam 63 të prekur dhe 5 të vdekur, në Singapor 238 raste, me 33 të vdekur, në Kanada 251 raste 43 të vdekur; në Malajzi 5 raste, 2 të vdekur; në Filipine 14 raste, 2 të vdekur; në Tajlandë 9 raste, 2 të vdekur; në Afrikën e Jugut një rast, një i vdekur; Francë 7 raste, 1 i vdekur. Raste të prekurish, por pa viktima kishte edhe në Indonezi, Korenë e Jugut, Zelandën e Re, Australi, Mongoli, Indi, Rusi, Kuvajt, Spanjë, Itali, Zvicër, Gjermani, Rumani, Suedi, Irlandë, Britani dhe SHBA.