PD: Prokuroria shqiptare Të bashkëpunojë me atë të Leçes
Partia Demokratike i kërkoi dje Prokurorisë shqiptare që të bashkëpunojë me homologët e saj në Leçe, për të zbardhur të vërtetën në lidhje me mbetjet të dyshuara si kancerogjene që ndodhen prej disa ditësh të bllokuara në një traget në Vlorë. Drejtuesi i Departamentit të Mjedisit, Jamarber Malltezi, ishte dje pranë Portit të Vlorës ku ndodhet edhe ngarkesa ku u shpreh se shqiptarët po bëhen pre e luftës së klaneve mafioze të PS- së. “Prokuroria shqiptare i detyrohet popullit të Vlorës që të mos mbyllë sytë, por të bashkëpunojë me Prokurorinë e Leçes për të hetuar këtë trafik ndërkombëtar mbetjesh të rrezikshme, të sjellin Polici shkencore dhe të marrin mostrat për t’i analizuar në Laboratorët e Akredituar të Mbetjeve të rrezikshme pasi në Shqipëri nuk ka asnjë laborator të akredituar për këto lloj mbetjesh. Shqiptarët nuk kanë pse bëhen kurban të luftës së klaneve në PS, që duan të bëjnë biznes me vdekjen”, u shpreh Malltezi. Drejtuesi i Departamentit të Mjedisit në PD akuzoi qeverinë se dy ditë më parë tentoi që të fshehë ngjarjen, duke e hedhur poshtë mundësinë që materialet e sekuestruara në tragetin e ankoruar në Vlorë të jenë kancerogjene. Sipas tij, vendi ynë nuk ka mundësi që të bëjë analiza të tilla për mbetjet. “Kjo qeveri duhet hequr qafe si një mbetje e rrezikshme për qytetarët. Në përpjekje për të fshehur importin e kancerit, qeveria dje tentoi të gënjente sikur nuk janë mbetje të rrezikshme, por ky vend nuk ka laboratorë të akredituar të mbetjeve të rrezikshme, ndërsa mbetjet radioaktive janë pjese e vogël e mbetjeve të rrezikshme. Azbesti dhe vajrat e ndotura nuk janë radioaktive, por janë mbetje toksike kancerogjene”, vijoi Malltezi.
AKUZAT PËR KRYEMINISTRIN Malltezi risolli dje në vëmendje debatin e ashpër pak vite më parë për ligjin e importit të mbetjeve. Ligj i cili nuk u miratua nga qeveria socialiste, por kreu i Departamentit të Mjedisit në PD akuzoi Kryeministrin Rama se e ka zëvendësuar ligjin me një Vendim të Këshillit të Ministrave. “Të gjithë mbani mend sesi Edi Rama u përpoq të kalonte ligjin për importin e mbetjeve para pak vitesh me përbetimet se Portet dhe Doganat Shqiptare ishin të sigurta. Ndonëse nuk e miratoi dot ligjin, Rama lejon importin e mbetjeve nën etiketën si kimikate, përmes VKM 665, të datës 21.09.2016, ‘ Për eksportin dhe importin e kimikateve të rrezikshme’”, vijoi Malltezi. Anëtari i kryesisë së PD- së akuzoi kreun e qeverisë se ka miqësi me pronarin e kompanisë që trajton mbetjet dhe se ngarkesa e 15- të e ardhur nga Italia, sipas tij, është kapur për shkak të prishjeve të pazareve.