Meta: Po morën Kushtetuesen, puçistët do shembin Teatrin
“E kthejmë 2 marsin në referendum të triumfit ndaj puçistëve”
Duke iu përgjigjur aktorit të mirënjohur, Neritan Liçaj, Presidenti Meta ka dhënë disa mesazhe për tubimin që ka thirrur më 2 mars.
Komentit të Liçajt, që e falënderonte për angazhimin në mbrojtje të Kushtetutës, Meta iu përgjigj duke i thënë se është detyra e tij dhe se dëshiron që t’i bashkohen të gjithë shqiptarët në këtë manifestim të demokracisë. Liçaj, në mesazhin e tij në “Facebook”, i shkroi Metës se mbrojtja e Kushtetutës është detyra e çdo shqiptari dhe se për këtë arsye, ai do të jetë në bulevardin “Dëshmorët e kombit”, më 2 mars. “Do jem aty pa diskutim. Kushtetuta është akti themeltar i Shqipërisë, pra dhe i imi. Kontrata që ka çdo njeri nga ne ka me Kombin e tij. Mbrojtja e Kushtetutës, të cilën ju e ruani, zoti President, është detyrë patriotike”, theksoi Neritan Liçaj. Ndërsa Meta, pasi e falënderoi Liçajn për mesazhin e tij, por edhe qëndresën që Aleanca për Mbrojtjen e Teatrit ka bërë në këto muaj, bëri edhe një paralajmërim. Sipas
Përballja e radhës së Presidentit Meta me maxhorancën socialiste që e zgjodhi në këtë pozicion dhe që pritet të kulmojë në 2 mars, duket se do të jetë më e forta e dy viteve, ku fërkimet dhe përplasjet për çështje të ndryshme kanë qenë të shumta. Dy muaj pasi u duk se situata politike mes Presidentit dhe PS- së u qetësua, do mjaftonin dy ligje që gjendja të ndizej edhe një herë. Ishin dy ligjet për funksionimin e Gjykatës Kushtetuese dhe ILD- në që u ndryshuan dhe u miratuan nga PS- ja në Kuvend, të cilat bën që Meta të reagonte më ashpër se herët e tjera. Një grusht shteti i orkestruar nga Rama dhe i zbatuar nga e gjithë maxhoranca dhe me ndihmën e kreut të KED, Ardian Dvorani, kjo ishte akuza që Meta ngriti dhe për të cilën shfaqi disa prova. Mbi bazën e kësaj akuze, provave dhe argumenteve kundër Ramës, Meta ka thirrur tubim në 2 mars, në ditën që simbolizon Besëlidhjen e Lezhës, të vitit 1444. Kjo është tentativa e dytë e Metës për t’i nxjerrë qytetarët në shesh kundër qeverisë, pasi më herët, plani i tij për tubim në 8 dhjetor në “Qytetin Studenti”, ishte anuluar, për shkak të tërmetit tragjik i 26 nëntorit që shkaktoi 51 viktima në Durrës dhe Thumanë.
Metës, nëse ata që ai i quan puçistë do të arrijnë të marrin edhe Gjykatën Kushtetuese, Teatri Kombëtar nuk do të jetë i pari dhe i vetmi monument kulturor që do të shembet. Sipas tij, për llogari të oligarkëve shqiptarë, por edhe të një organizate ndërkombëtare do të shkatërrohen të gjitha objektet e trashëgimisë kulturore në vend. “Faleminderit, i dashur Neritan! Ju pres me shumë kënaqësi, jo vetëm ju personalisht, por të gjithë artistët heronj dhe patriotë, në 2 mars, në mbrojtje të Kushtetutës dhe Gjykatës Kushtetuese. Nëse organizata mafioze rrëmben në mënyrë antikushtetuese Gjykatën Kushtetuese, ata do zhdukin jo vetëm teatrin, por çdo trashëgimi kulturore e kombëtare për llogari të disa oligarkëve dhe organizatës ndërkombëtare”, u shpreh Meta. Më tej, Presidenti i Republikës theksoi në përgjigjen ndaj aktorit, se ai bashkë me të gjithë shqiptarët do të fitojnë përballë atyre që i quan puçistë dhe organizatë mafioze. Sipas Metës, ata tentojnë të shfaqen si të fortë, por populli i bashkuar do t’i mposhtë dhe drejtësia për Shqipërinë dhe shqiptarët do të vijë shumë shpejt. “Ndaj është detyra ime si President i Republikës t’i bëj thirrje të gjithë popullit shqiptar të hapë sytë mirë në këto momente decizive për fatet e kombit dhe demokracisë. Shqiptarët e bashkuar rreth Kushtetutës dhe Flamurit Kombëtar do të fitojnë! Të rivendosim plotësisht rendin kushtetues dhe demokratik, siç e ka shprehur vullnetin e tij populli shqiptar, me referendum, në 22 nëntor 1998. Ndaj ta kthejmë 2 marsin në një referendum madhështor të triumfit të sovranit ndaj puçistëve dhe tradhtarëve, kudo qofshin. Presidenti i njeh prej kohësh, por tani fytyrat e tyre hipokrite po i zbulojnë të gjithë shqiptarët. Bëjnë si tigra për të frikësuar njerëzit e thjeshtë, por janë vetëm minj përpara popullit shqiptar dhe drejtësisë që do të vijë. U zgjata pak, por ju dhe shumë artistë të tjerë keni vite në protestë për Teatrin dhe meritoni mirënjohjen e çdo shqiptari. Ndaj ata do të vinë, jo vetëm për të mbrojtur të drejtat e tyre kushtetuese, që dhunohen çdo ditë, por dhe në mirënjohje të protestës suaj legjendare përballë bandës që nuk njeh Kushtetutë, ligj, konventë ndërkombëtare dhe atdhe”, theksoi Presidenti, Ilir Meta.