Supergol dhe asist, Kamberi mahnit Skocinë e Xherardin

Trajneri i Rejnxhërs: Floriani ndryshoi ndeshjen sa hyri

Supergol dhe një asist. Kështu ka zgjedhur Florian Kamberi të prezantohet me skuadrën e tij të re, Rejnxhërs, dhe tifozët e saj.

Pas 100 minutash të luajtura në kampionatin skocez dhe në Ligën e Europës me ekipin e ri, erdhi edhe goli i parë. Sulmuesi i Kombëtares shqiptare ( ende po pret të bëjë debutimin) shënoi një gol spektakolar, duke i mahnitur të gjithë në barazimin 2- 2 kundër St. Xhonston. Pas një krosimi nga e majta, 24vjeçari lëshon një predhë në hyrje të zonës, e cila i shtang të gjithë dhe shërben për të barazuar përkohësisht shifrat në 1- 1. Trajneri Stiven Xherard e kishte lënë në stol dhe e aktivizoi Kamberin si zëvendësues në fillimin e pjesës së dytë dhe pas 5 minutash lojë, shqiptari barazoi shifrat. Ai ishte në një ditë fantastike, sepse provoi me të gjitha mënyrat që të shënonte gol, por portieri kundërshtar e ndali. Kamberi u bë sërish protagonist në minutën e 71- të kur dha asistin për golin e avantazhit nga Aribo, por për fatin e tij të keq, ndeshja u barazua dhe Xherard mori vetëm një pikë. Katër gola - Për Florian Kamberin ky ishte goli i katërt në këtë sezon të kampionatit skocez. Sulmuesi shqiptar u transferua nga Hibernian drejt Rejnxhërsit në merkaton e janarit dhe lëvizja duket se është e goditur. Tre gola më parë i ka shënuar me Hibernianin, ndërsa dje u zhbllokua me Rejnxhërsin. Kamberi është grumbulluar nga trajneri Edi Reja për dy ndeshjet e fundit eliminatore, por nuk mundi të debutonte, për shkak të mungesës së dokumentacionit dhe për një dëmtim të vogël që pati në seancat stërvitore. Dëshira e tij është të luajë për kuqezinjtë.

Elozhe - Trajneri Stiven Xherard e ka vlerësuar maksimalisht sulmuesin shqiptar dhe thotë se aktivizimi i tij ndryshoi lojën. "Të gjithë ndoshta janë duke folur për performancën e Florianit dhe bëjnë mirë. Ishte fantastik. Shënoi një gol të mrekullueshëm dhe pasimi për golin e dytë ishte fantastik. Sapo ai u fut në fushë, ekipi nisi të krijonte shumë raste dhe dinte çfarë të bënte. Megjithatë, jam i zhgënjyer me fazën mbrojtëse", tha trajneri i Rejnxhërsit.