Nga plani 10- vjeçar te mocioni i ish- ministrave, tri ditët e Kongresit të PS

"Presidentit, Kryetarit të Kuvendit, Kryeministrit, ministrit, deputetit, kryebashkiakut t'u konfiskohet pasuria e paligjshme"

Të kufizohet mandati i kryetarit të partisë, kryeministrat, ministrat të deklarojnë pasurinë dhe t'u konfiskohet pasuria e paligjshme.

Këto janë disa nga pikat e mocionit që një grup socialistësh, disa prej tyre ish- ministra si Arta Dade, Maqo Lakrori, ish- kryetarët e njësive bashkiake në Tiranë, Luan Zhegu dhe Përparim Bodinaku, por dhe deputeti Nazmir Bilani apo dhe ishkryetarja e PS- së së Tiranës, Eva Allushi, i kërkoi përfaqësisë së Kongresit që të përfshijnë për diskutim mocionin e tyre, i cili ka si qëllim kthimin e pushtetit tek anëtari i partisë. Ata kërkojnë që 10 propozimet e tyre të përfshihen të plota si ndryshime statutore, duke nisur që nga mandati i kryetarit të partisë dhe sekretarit të përgjithshëm. "Funksionet e kryetarit, sekretarit të përgjithshëm dhe sekretarëve të Partisë Socialiste të Shqipërisë janë të papajtueshme me funksionet e Presidentit të Republikës, Kryetarit të Kuvendit, Kryeministrit, ministrit dhe kryetarit të bashkisë. Numri i mandateve partiake të kryetarit, sekretarit të përgjithshëm dhe sekretarëve të Partisë Socialiste të Shqipërisë kufizohet deri në dy", thuhet në mocionin e tetë socialistëve që kanë firmosur.

TË ZGJEDHURIT

Mocionistët kërkojnë që të zgjedhurit socialistë, që nga deputetët, kryetarët e bashkive dhe këshilltarët bashkiakë, të propozohen nga organizatat socialiste dhe jo nga forumet drejtuese apo kryetari i partisë. "Kandidatët e Partisë Socialiste të Shqipërisë për deputetë, kryetarë bashkie dhe këshilltarë vendorë propozohen nga organizatat socialiste të zonës zgjedhore vendore, në të cilën ato veprojnë. Kandidatët zhvillojnë fushatë parazgjedhore në parti e në komunitet dhe përzgjidhen me votim të fshehtë. Forumet partiake drejtuese, që shpallin emrat e kandidatëve zyrtarë të Partisë Socialiste të Shqipërisë në zgjedhjet parlamentare dhe vendore, detyrohen që të respektojnë propozimin e organizatave socialiste. Përndryshe, duhet të argumentojnë mospajtimin e vet me anëtarësinë socialiste të këtyre organizatave dhe të kërkojnë prej tyre rivotim të fshehtë; ky rivotim është vendimtar", thuhet në mocion.

VETINGU

Ndër të tjera, ata kërkojnë edhe veting të pasurisë së atyre të mandatuarve që kanë pasur lidhje me fondet publike në qeveri apo dhe në Parlament. "Partia Socialiste e Shqipërisë mbështet politikisht dhe publikisht veprimtarinë e drejtësisë së reformuar dhe të institucioneve të saj, përfshirë SPAK dhe BKH, për pastrimin e klasës politike drejtuese në pushtet dhe në opozitë nga korrupsioni dhe bashkëpunimi me krimin e organizuar. Këtu përfshihen: ( a) - Verifikimi sistematik dhe pa asnjë përjashtim i pasurisë së të gjithë personave që kanë kryer, kryejnë ose do të kryejnë funksionet e Presidentit t ë Republikës, Kryetarit të Kuvendit, Kryeministrit, ministrit, deputetit, kryetarit të bashkisë; ( b)- Konfiskimi i pasurive të tyre të paligjëshme; ( c)Dënimi sipas ligjit i personit abuzues, pavarësisht funksionit politik që ka pasur, që ka aktualisht apo që mund të ketë në të ardhmen", thuhet në mocion.

BLERJA E VOTËS

Nisur nga problematika e evidentuara në zgjedhjet e viteve të fundit, ajo e shitblerjes së votës, mocionistët kërkojnë një qëndrim të prerë nga Partia Socialiste. "Cilido porositës dhe përfitues i manipulimit dhe vjedhjes së votave në zgjedhjet brenda partisë përjashtohet përgjithmonë nga Partia Socialiste e Shqipërisë: ( a) - pavarësisht kohës kur e ka dhënë porosinë dhe/ ose kur ka përfituar nga manipulimi dhe vjedhja e votës; ( b) - pavarësisht funksionit që mund të ketë pasur ose vazhdon të ketë në parti apo në pushtetin legjislativ dhe ekzekutiv", thuhet në mocionin e tetë socialistëve, drejtuar përfaqësisë së Kongresit.

PROGRAMI POLITIK DERI NE 2030

Sot socialistët do të mbledhin Kongresin e tyre, më të gjatin në historinë e tyre, i cili nis sot në orën 17: 00 dhe përfundon më 1 mars. Programi Politik "SHQIPËRIA QË DUAM 2030", do të shpaloset nga Sekretari për Koordinimin e Këshillave të Rajoneve, Ilir BEQAJ. Dita e parë, 28 shkurt, do t'i kushtohet gruas në politikë dhe në vendimmarrje. Ditën e dytë, Kongresi do të merret me çështjet zgjedhore në PS, analiza e punës, ndryshimet statutore, por dhe programin e qeverisë për rindërtimin e zonave të prekura nga tërmeti. Dita e tretë e Kongresit do t'i kushtohet rinisë dhe Paktit për Universitetin. Të shtunën, ora 10: 00, hapja e Kongresit do të bëhet nga sekretari i përgjithshëm i PS- së, Taulant Balla, pasuar prej fjalës përshëndetëse nga Presidenti i Partisë Socialiste Europiane, Sergei Stanishev. Një pjesë e konsiderueshme kohe në Kongres i është dedikuar raportimit mbi drejtimet kryesore të politikave legjislative dhe qeverisëse ku përfshihen, rindërtimi pas tërmetit; Pakti me Universitetin; Drejtësia dhe sundimi i ligjit, Energjia dhe Infrastruktura; Shqipëria që duam dhe turizmi; E drejta e pronës, mbrojtja e territorit dhe procesi i legalizimeve; Integrimi Europian dhe Rajonal. Pjesa e tretë e Kongresit i është dedikuar organizimit të procesit të votimit dhe numërimit të votave për zgjedhjen e anëtarëve të Asamblesë Kombëtare dhe të Komisionit të Garancive Statutore & Etikës së partisë. Dita e tretë e Kongresit u është dedikuar të rinjve eurosocialistë.