Rama: Kavalishenca në Durrës, karantinë për koronavirusin
“Shërbimi i Infektivit në QSUT dhe spitali i Sanatoriumit pjesërisht vend karantine, jemi në situatë infodemie”
Qeveria është bindur që tregimi i vendkarantinës së rasteve të mundshme me koronavirus në vend nuk përbën panik.
Ndaj, dje, nga mbledhja e Komitetit Kombëtar të Sigurisë, Kryeministri Edi Rama vendosi të shuajë kuriozitetin e të gjithëve, duke bërë me dije se personat që do të evidentohen me virusin ngjitës do të trajtohen në shtëpinë e pushimit të ushtarëve në Durrës. Vendkarantina të pjesshme do të jenë edhe Shërbimi Infektiv në QSUT dhe Spitali i Sanatoriumit. "Ne kemi përcaktuar disponimin e strukturave akomoduese publike të shtëpisë së pushimit të Ministrisë së Mbrojtjes në zonën e Durrësit, ku me OBSH- në është konstatuar përmbushja e të gjitha kushteve dhe garancia për siguri të plotë për të gjithë. Shërbimi i Sëmundjeve Infektive në Qendrën Spitalore Universitare ' Nënë Tereza' dhe Spitali Universitar "Shefqet Ndroqi" kanë në gatishmëri bokse, dhoma izolimi funksionale dhe struktura në dispozicion për nevojë terapie intensive". Edhe pse të rrethuar nga vendet fqinje që kanë konstatuar persona të prekur me koronavirus, deri dje Shqipëria zyrtarisht rezulton e paprekur.
"INFODEMIA" Më shumë sesa vetë virusi, për Kryeministrin më problematik është infodemia ose përhapja e lajmeve të rreme që shkaktojnë panik, duke drejtuar gishtin e përgjegjësisë te politika dhe media. "Rendja e ethshme për informacion përmes klikimeve që sjell shumëfishimin e titujve që përmbajnë fjalën koronavirus apo viktimë, si kudo, por nga ana tjetër, edhe një karakteristikë jo fort e përhapur që shoqëron situatat infodemike në Shqipëri, përpjekja individuale apo e grupeve të caktuara për të shfrytëzuar frikën për të nxitur panikun, për të prodhuar alarm të vazhdueshëm në funksion interesash mizerabël politike apo mediatike", deklaroi kreu i qeverisë.
MASAT Pikërisht për të mos ushqyer më tej "infodeminë", Rama vendosi të mos lërë shteg për sajesa dhe interpretime, duke folur me fakte mbi masat që do të ndërmerren dhe shifrat e hyrje- daljeve nga vendet në alert. "Është forcuar mbikëqyrja aktive në të gjitha nivelet e sistemit shëndetësor. Deri më tani janë kontrolluar imtësisht 8122 persona pasagjerë dhe në nivel të pikave kufitare detare dhe tokësore, 14 mijë udhëtarë. Në Aeroportin "Nënë Tereza" dhe në Portin të Durrësit e të Vlorës janë disponuar mjedise të caktuara për izolim dhe atë që quhet karantina e përkohshme në raste të dyshuara. Janë marrë masat për rritjen e stokut të mjeteve të mbrojtjes specifike personale për të gjitha hallkat e shërbimit", nënvizoi kreu i Këshillit të Ministrave, teksa iu desh të bëjë edhe "psikologun" duke apeluar qytetarët në përballimin me qetësi të situatës. Në të njëjtën linjë ishte edhe ministrja Ogerta Manastirliu, e cila siguroi se janë të përgatitur për çdo skenar të mundshëm. "Që me konfirmimin e rastit të parë, ne vëmë në dispozicion strukturat që fillojnë me Spitalin Infektiv në QSUT, me një kapacitet prej 80 shtretërish dhe me një forcë të punonjësve të shëndetësisë, 109 punonjës, të cilët do të jenë të fokusuar për të trajtuar sipas protokolleve më të mira rastet e mundshme. Kemi përcaktuar bokset, dhomat e izolimit, është investuar në të gjitha linjat e oksigjenit në strukturën e Infektivit, për të bërë të mundur transformimin e këtij spitali, nëse do të kalonim në skenarët e tjerë, që do të ishin nga 0 në 100 dhe 100 deri në 150 raste të prekura. Sigurisht, duke siguruar këtu të gjitha kapacitetet dhe nevojat për ato raste të rënda, pasi dihet që 5% e rasteve që konfirmohen me koronavirus janë raste, të cilat do të kenë nevojë për suport respirator".