PD: Qendrat shëndetësore, pa maska dhe doreza mbrojtëse
Partia Demokratike denoncoi dje mungesën e maskave mbrojtëse, të dorezave dhe të veshje të posaçme për mjekët në dy qendra shëndetësore në kryeqytet. Konkretisht, në Qendrën Shëndetësore Nr. 3 dhe 5. Ish- deputeti i PD- së, Bardh Spahia, pas monitorimit akuzoi qeverinë se po bën propagandë dhe nuk është përgatitur realisht për mbrojtjen e qytetarëve. "Pas vizitës sonë në ambientet e brendshme dhe komunikimit me mjekët dhe personelin shëndetësor të kësaj qendre, konstatojmë se deklaratat e Kryeministrit dhe të qeveritarëve, jo vetëm që nuk janë të vërteta, por ka mangësi të theksuara në pajisjen e këtyre qendrave me mjetet e duhura për të përballuar këtë situatë tepër shqetësuese. Nga konstatimet tona u vu re se ka mangësi të theksuara në pajisjen me maska mbrojtëse, për të mos folur për mospasjen e veshjeve të duhura për përballimin e një rasti të dyshuar me coronavirus", tha Spahia. Ish- deputeti demokrat konstatoi se stafi shëndetësor është i patrajnuar në rast shfaqjeje të virusit në vendin tonë, ndërsa rezulton se ambientet e shërbimit shëndetësor nuk janë dezinfektuar apo sanitarizuar. "Ka mungesë të informacionit dhe trajnimeve, instruktimit të personelit shëndetësor për mënyrën e përballimit dhe të veprimeve në rast konstatimi të një pacienti të prekur nga koronavirus. Mungesa, të cilat pastaj detyrimisht shtrihen përtej personelit mjekësor dhe te qytetarët shqiptarë. Një tjetër aspekt shqetësues, të cilin do të doja ta theksoja sot, ishte mungesa jo vetëm e informacionit, por edhe e dezinfektimit dhe sanitarizimit të ambienteve të këtyre qendrave shëndetësore, në të cilat kalon një fluks i madh qytetarësh shqiptarë, shpeshherë me simptoma të ngjashme me ato të koronavirusit", vijoi Spahia.