Gjonaj i përgjigjet Metës: Halli e motivon kundër Reformës
"Botimi i vendimit të KED- it në QBZ nuk ka sjellë pasoja"
Akuzave publike të Presidentit Meta dhe denoncimit të tij në Prokurorinë e Posaçme Antikorrupsion ( SPAK), ministrja e Drejtësisë, Etilda Gjonaj, zgjodhi t'u përgjigjej dje përmes një konference për mediat.
Tentativën për grusht shteti, që sipas Presidentit Meta ishte orkestruar në Ministrinë e Drejtësisë, Gjonaj e cilësoi si një lajthitje të kreut të shtetit. Sipas saj, kjo nismë që ka ndërmarrë Meta kohët e fundit nuk është gjë tjetër, veçse një tentativë për t'i shpëtuar Reformës në Drejtësi. "Unë u rezervoj të gjithë keqardhjen time për hallin e madh që i motivon në luftën kundër Reformës në Drejtësi, por akuzat ndaj meje nuk ua lehtësojnë këtë hall. Presidenti ka krijuar një kauzë fiktive në funksion të betejave të tij politike, që në çdo rast nuk janë në përputhje me përgjegjësitë e tij të larta kushtetuese, si përfaqësues i unitetit të popullit, në momentin e rëndësishëm që po kalon Shqipëria në prag të negociatave", u shpreh Gjonaj.
PËR ANËTAREN E GJK
Në këtë reagim të parë nga një konferencë për shtyp për akuzat e Presidentit, indirekt, ministrja Gjonaj tregoi se qeveria e ka pranuar tashmë Marsida Xhaferllarin si anëtare të Gjykatës Kushtetuese, kur tha: "Deformimet e rënda faktike, juridike dhe logjike të këtij show politik presidencial, mbi gjoja rrëmbimin e kompetencave të Presidentit, janë mbresëlënëse për këdo që i di faktet. Për shembull, kujt dhe për çfarë i drejtohet në thirrjen e tij të dëshpëruar zoti President, mbi zgjedhjen e anëtarëve të Gjykatës Kushtetuese, kur sot gjyqtarja e zgjedhur prej tij, me një procedurë në kundërshtim me Kushtetutën dhe tërësisht të paligjshme, ushtron funksionin si anëtare e GJK- së?!"
BOTIMI NË QBZ
Ministrja e Drejtësisë ka shpjeguar edhe akuzat e Presidentit në lidhje me korrespodencën e dokumenteve mes Ministrisë- KuvenditKED- it dhe QBZ- së. Sipas saj, botimi në Fletoren Zyrtare ditën e shtunë nuk është një gjë e pazakontë. "Presidenti paraqet pa pushim një rrëfim me natyrë policeske, lidhur me botimin në Fletoren Zyrtare të zgjedhjes së zonjës
Arta Vorpsi si anëtare të Gjykatës Kushtetuese. Bërthama e rrëfimit është thjesht dita e shtunë. Pra, fakti se botimi në Fletoren Zyrtare është bërë të shtunën, i ka mjaftuar zotit President të dalë në konkluzionin se jemi përpara një konspiracioni armiqësor, përmes të cilit synohet një grusht shteti. Sinqerisht, e kam shumë të vështirë ta besoj se Presidenti i Republikës e beson vetë këtë version kaq ekstremist për imagjinatën e çdo njeriu normal, të një konspiracioni me finalitetin e një grushti shteti, i cili provohet me argumentin se ditën e shtunë, grupi armiqësor në Ministrinë e Drejtësisë është vënë në lëvizje duke synuar të përfitojë nga fakti se shteti është pushim. Sikur Presidenti ose këshilltarët e tij të kishin bërë një kërkim krejt sipërfaqësor në arkiv, do të kishin mësuar se jo vetëm e shtuna, por edhe e diela janë ditë që figurojnë më parë në Fletoren Zyrtare", theksoi ministrja.
PASOJAT
Ministrja Gjonaj foli edhe për pasojat që mund të ketë shkaktuar vendimi i saj për t'ia çuar për botim Qendrës së Botimeve Zyrtare vendimin e KED- it, që sipas Presidentit është bërë në shkelje të Kushtetutës. Sipas ministres së Drejtësisë, një veprim i tillë nuk është bërë në shkelje të ligjit, por edhe nëse do të provohej akuza që bën Meta, pasojat e këtij veprimi janë zero. "Është me shumë rëndësi të mbahet parasysh se botimi në Fletoren Zyrtare nuk u jep fuqi juridike akteve që botohen në të ( përveç akteve që e parashikojnë shprehimisht), por shërben për t'i bërë të njohura botërisht ato. Pra, nuk është botimi që u jep fuqi juridike vendimeve të KED- it, por vetëm i bën me dije publikut aktin që ka sjellë ose do të sjellë pasoja juridike. Botimi në Fletoren Zyrtare nuk ka sjellë as rrëmbimin e kompetencës së Presidentit për gjyqtaren kushtetuese dhe as pasojën, për sa kohë ka të bëjë vetëm me njohjen e asaj që ka urdhëruar ligji automatikisht. Mund të konstatohet lehtësisht se e vetmja pasojë është dalja e Presidentit jashtë kornizës ligjore dhe përgjegjësive të tij kushtetuese", deklaroi Etilda Gjonaj.
Presidenti paraqet pa pushim një rrëfim me natyrë policeske, lidhur me botimin në Fletoren Zyrtare të zgjedhjes së zonjës Arta Vorpsi si anëtare të Gjykatës Kushtetuese. Bërthama e rrëfimit është thjesht dita e shtunë.