Kolegji shkarkon anëtarin e KLP, Besnik Cani
KPA: Nuk justifikoi pasurinë dhe cenoi besimin e publikut
Shkalla e dytë e procesit të vetingut shkarkoi dje anëtarin e Këshillit të Lartë të Prokurorisë, Besnik Cani, me argumentin se ka mungesë të burimeve të ligjshme për justifikimin e pasurisë dhe se ka cenuar besimin e publikut në sistemin e drejtësisë. Cani u konfirmua nga shkalla e parë, Komisioni i Pavarur i Kualifikimit në vitin 2018, vendim që u kundërshtua dhe nga përfaqësuesit ndërkombëtarë të ONM- së. "Trupi gjykues i Kolegjit të Posaçëm të Apelimit, i përbërë nga Rezarta Schuetz kryesuese, Ardian Hajdari relator, Albana Shtylla, Luan Daci, Sokol Çomo anëtarë, shpalli vendimin për çështjen ( JR) nr. 12/ 2019, datë 22.02.2019, që i përket ankimit të paraqitur nga Komisioneri Publik, kundër vendimit të Komisionit të Pavarur të Kualifikimit që lidhet me procesin e rivlerësimit kalimtar të subjektit të rivlerësimit Besnik Cani. Në përfundim të gjykimit, bazuar në nenin 66, pika 1, shkronja ' b' e ligjit nr. 84/ 2016 ' Për rivlerësimin kalimtar të gjyqtarëve e prokurorëve në Republikën e Shqipërisë', trupi gjykues, në mënyrë unanime, vendosi: Ndryshimin e vendimit nr. 84, datë 27.11.2018, të Komisionit të Pavarur të Kualifikimit dhe shkarkimin nga detyra të subjektit të rivlerësimit Besnik Cani, prokuror në momentin e fillimit të procesit të rivlerësimit, anëtar i Këshillit të Lartë të Prokurorisë në momentin e shpalljes së këtij vendimi. Ky vendim është përfundimtar dhe ka efekt të menjëhershëm", njoftoi dje KPA- ja.
PROBLEMET
Sipas Kolegjit të Posaçëm të Apelimit, ish- prokurori Besnik Cani kishte mungesë burimesh të ligjshme për të justifikuar blerjen e një apartamenti, si dhe kursimet e deklaruara për vitet 20052006. KPA tha se pas shqyrtimit, trupa gjykuese arriti në të njëjtin përfundim edhe për mbulimin e shpenzimeve për vitet 2010- 2015. Sa i takon blerjes së një sipërfaqeje trualli në Paskuqan, një automjeti të markës "Benz" dhe një garazhi pa deklaruar burimin e krijimit, Kolegji arriti në përfundimin se anëtari i KLP- së kishte cenuar besimin e publikut te sistemi i drejtësisë. Kolegji arriti në përfundimin se Cani kishte cenuar besimin e publikut edhe në kriterin e profesionalizimit, përmes lidhjes së një kontrate me kompaninë për ndërtimin e një karburanti dhe një njësie shërbimi mbi truallin e tij në Paskuqan.
PLOTËSIMI
Me shkarkimin e Besnik Canit, Këshilli i Lartë për të tretën herë do të duhet të plotësohet. Pritet që në ditët në vazhdim, Prokuroria e Përgjithshme të hapë garën për një vend në Këshill dhe më pas të thërrasë mbledhjen e përgjithshme të prokurorëve për zgjedhjen e anëtarit që do të zëvendësojë Canin dhe plotësojë me 11 Këshillin e Lartë të Prokurorisë. Më herët, ky institucion ka humbur 2 anëtarë të tjerë për shkak të procesit të vetingut, Antoneta Sevdarin dhe Gentian Osmanin.