Tenderët sekretë, PD: Dosja iu dorëzua SPAK- ut pasi u dogjën disa dokumente
Bardh Spahia publikon emailin: Pas korrupsionit qeveria bën krim tjetër, asgjëson dhe falsifikon dokumentet shtetërore
Pas akuzave për tenderët sekretë ndaj Ministrisë së Shëndetësisë, PD ka vijuar denoncimin duke shtuar se në Ministrinë e Shëndetësisë janë djegur dokumentet.
Sekretari i përgjithshëm i PD- së, Gazmend Bardhi, përmes një postimi në "Facebook", tha dje se ministria ia ka dorëzuar dokumentet e tenderëve sekretë Prokurorisë së Posaçme, pasi në zyrën e Prokurimeve ra zjarr. "Lajme të reja nga fronti i vjedhjes me tenderë sekretë! Bashkëpunëtorja në vjedhje e Edi Ramës ka 1 muaj që thotë në çdo media se jemi të hapur për çdo hetim, por dokumentet në SPAK i dërgon me 3 javë vonesë, vetëm pasi i vë zjarrin ministrisë! SPAK nuk ndërhyn, pret dhe e rinjofton që nëse nuk i sjell deri javën tjetër, bëhu gati se do vijmë t'i marrim vetë në ministri! Koordinim perfekt i një bande hajdutësh në kohë pandemie", shkroi Bardhi. Ndërkohë, përmes një deklarate për shtyp ditën e djeshme, ish- deputeti i PDsë, Bardh Spahia, përmes publikimit të një emaili, konfirmoi se rreth 1 muaj më parë në Ministrinë e Shëndetësisë, konkretisht në zyrën e Prokurimeve, kishte rënë zjarr dhe ishin djegur disa dokumente, ndërsa disa të tjera ishin lagur. "Në datën 15 prill, në orën 18: 00, në Ministrinë e Shëndetësisë janë djegur dokumente. Pas rënies së alarmit për zjarr, rojet e godinës kanë konstatuar djegien e dokumenteve në katin e katërt të godinës. Siç e shikoni, kjo nuk është fantazi e jona. Është një email zyrtar i Ministrisë së Shëndetësisë, që provon rënien e zjarrit dhe djegien e dokumenteve në katin e zyrës së Prokurimeve, pikërisht atë që mohoi dje paturpësisht ministrja e Vjedhjeve COVID, Ogerta Manastirliu. Hajdutëria me tenderët sekretë është aq e madhe, saqë nga një krim korrupsioni, qeveria e Edi Ramës po kryen edhe një tjetër vepër penale, siç është asgjësimi dhe falsifikimi i dokumenteve shtetërore për të zhdukur provat e megavjedhjes me mjetet mbrojtëse për mjekët, me maskat anti- COVID, me kitet e testimit, me pajisjet shëndetësore të respiratorëve", tha Spahia.
REAGIMI I MSH
Akuzat e opozitës, ministrja e Shëndetësisë, Ogerta Manastirliu, i vlerësoi si qesharake, që kërkonin të manipulonin opinionin publik.
Përmes një reagimi të dërguar nga zyra e shtypit e ministrisë, ministrja Mansatirliu shprehet se emaili, të cilit i referohet opozita, është thjesht një tërheqje vëmendje ndaj një punonjësi pas një incidenti. "Nuk ka rënë zjarr në institucion. ' Zbulimi' i bërë sot nga PD i referohet një emaili ' tërheqje vëmendje' të para 26 ditëve, nga përgjegjësja për sigurinë në ministri, e cila i është drejtuar stafit pas një incidenti të shkaktuar nga një punonjëse, ndaj së cilës më pas është marrë masë administrative. Ministria e Shëndetësisë dhe Mbrojtjes Sociale hedh poshtë aludimet dhe shpifjet e PD- së, që kërkon të manipulojë opinionin me histori djegie letrash në korridore, kur e di i madh e i vogël se çdo dokument zyrtar ruhet në Protokollin e Ministrisë dhe të çdo institucioni", sqaroi ministria. Por PD këmbëngul në akuzat ndaj ministres. Ish- deputeti Spahia tha se fakti që znj. Manastirliu u investua vetë për të mohuar akuzat do të thotë se është e përfshirë drejtpërdrejt. "Fakti që Ogerta Manastirliu u investua personalisht dje për të mohuar zjarrin dhe djegien e dokumenteve, duke sulmuar kreun e opozitës me akuzat shabllon të dala boje, provon se ajo është e përfshirë direkt në vjedhje. Është vjedhja e shqiptarëve të varfëruar, së bashku me klientët e vet. Është blerja me dy deri në katërfish e mjeteve mbrojtëse për mjekët, e kiteve të testimit apo respiratorëve, që ka detyruar ministren të urdhërojë djegien e dokumenteve dhe fshehjen e ngjarjes", tha Spahia në deklaratën për mediat.
SPAK
Ndërkohë, në një tjetër reagim, duke iu përgjigjur akuzave për zhdukjen e fakteve të tenderëve, Ministria e Shëndetësisë sqaroi se më 8 maj i ka dërguar dokumentet në Prokurorinë e Posaçme. "Informojmë qytetarët se në Ministrinë e Shëndetësisë dhe Mbrojtjes Sociale, më datë 8 maj 2020, është firmosur shkresa përcjellëse ( faksimile bashkëlidhur) me dokumentacionin e të gjitha procedurave të kërkuara nga organet e drejtësisë. Siç e kemi deklaruar nga dita e parë, jemi të hapur për hetime nga organet e drejtësisë. E vërteta është se asgjë nuk është fshehur dhe dosjet janë në dritën e diellit. Që prej datës 27 prill, në Ministrinë e Shëndetësisë po vijon punën Kontrolli i Lartë i Shtetit, për të gjitha procedurat e zhvilluara në situatën e pandemisë, për mjetet e nevojshme për mbrojtjen e stafeve mjekësore dhe aparaturat jetëshpëtuese për pacientët e prekur nga COVID19", sqaroi Ministria e Shëndetësisë.