E kthyen shtëpinë në laborator droge, në pranga dy shqiptarë
Kërkesa e madhe për drogë pas karantinës zbuloi dy "grosistët"
Dy shtetas shqiptarë u arrestuan në Itali, pasi në shtëpinë e tyre u gjet një sasi droge e llojit heroinë, e cila llogaritet në vlerën e 2 milionë eurove.
Të arrestuarit janë Alfred Tusha, 29 vjeç, dhe Leonard Spahiu, 44 vjeç, të cilët jetonin në një shtëpi me qira në komunën Monesilvano në provincën Pescara. Gjatë kontrollit në këtë banesë u gjetën dy thasë me 34 kg heroinë, që ishin fshehur në një dollap. Hetimet filluan nga Policia në Chieti dhe Francavilla al Mare dhe me bashkëpunimin e kolegëve nga Pescara, pasditen e së premtes u arrit sekuestrimi i drogës. Karabinierët ranë në gjurmët e dy shqiptarëve duke analizuar historikun e konfiskimeve të drogës, që ishin kryer kohët e fundit. Ndonëse kishte një rënie të lehtë të shpërndarjes së drogës për shkak të emergjencës nga koronavirusi si në aspektin e përpunimit të drogës, ashtu edhe në furnizimin me sasi të mëdha, për shkak të kontrolleve të rrepta në rrugë dhe autostradë, karabinierët s'i ndërprenë hetimet, duke zbuluar shtëpinë ku ndodhej droga. Në momentin ku po afrohej fundi i fazës së parë të lirimit të disa masave nga koronavirusi, hetuesin kishin vënë re rritje të kërkesave të përdoruesve të drogës, si dhe kishin siguruar informacione për mbërritjen e një ngarkese të madhe lënde narkotike. Kështu u aktivizuan shërbime specifike, të cilat synonin të zbulonin momentin e mbërritjes së sasisë së drogës.
ZBULIMI
Pasditen e kaluar, gjatë veprimtarive hetimore, Policia vuri re një djalë të ri nga Chieti, mbajtës i zakonshëm i drogës, duke diskutuar me dy persona, të identifikuar si shqiptarë. Menjëherë pas kësaj, dy personat e dyshuar u larguan në drejtim të Pescara- s, gjithnjë të ndjekur nga karabinierët, të cilët, duke marrë parasysh edhe lajmet që transmetoheshin për furnizimin me drogë në krahinën e Pescara- s, vendosën të shkojnë edhe përtej kufijve të krahinës së Theatinës, me bashkëpunimin e kolegëve të angazhuar në shërbime të ngjashme. Me të arritur në Montesilvano, të dy shqiptarët dolën nga makina dhe hynë në një ndërtesë dhe pas një pritjeje të shkurtër, njëri prej të dyve u kthye me makinë. Duke pasur dijeni që do të bëhej një shkëmbim droge, karabinierët, duke ndierë se kishte mbërritur te shitësi me shumicë, vendosën të ndërhynin para se të niste shpërndarja. Gjatë kontrolleve të kryera në banesë u gjetën dy çanta me 25 kilogramë heroinë, 5 kg substancë e njëjtë, e paketuar dhe e gatshme për shitje me pakicë, 3 "bukë" të tjera me peshë 2 kilogramë, të fshehura në një zgavër nën tryezën e ngrënies, si dhe një sasi të konsiderueshme substance për përzierje. Duke marrë parasysh që 4 kg drogë do të peshonin tri herë më shumë përpara se të hidheshin në treg, substanca e sekuestruar, nëse do të hidhej në treg, do t'i jepte rreth 2 milionë euro organizatës kriminale. "Pas karantinës, kërkesa është rritur dhe për këtë arsye, çmimi i drogës po ashtu është rritur, sipas rregullit të njohur të marrëdhënies midis ofertës dhe kërkesës", shkruanin dje mediat italiane.