Reforma Zgjedhore, ku ndahet PD e PS
Opozita kërkon përgjigje për propozimet e depozituara deri më datë 9 mars, maxhoranca kujton punën e ekspertëve
Përfundimi i draftit konsensual i Reformës Zgjedhore brenda datës 31 maj ishte dakordësia e vetme e arritur dje nga mbledhja online e Këshillit Politik, me përfaqësues nga të gjitha palët politike.
Por ndonëse kanë kaluar rreth 4 muaj nga nisja e punës së këtij Këshilli, palët duket se janë kthyer në pikën zero sa i përket metodologjisë së punës. Përfaqësuesi i Partisë Demokratike në tryezën e Reformës Zgjedhore, Oerd Bylykbashi, deklaroi dje pas mbledhjes virtuale se opozita i kishte kërkuar maxhorancës që të shprehej për propozimet e bëra nga PD- ja dhe aleatët e saj deri më 9 mars, kur edhe u ndërpre puna e Këshillit për shkak të pandemisë së koronavirusit. "Cili është vullneti politik i maxhorancës në lidhje me të gjitha propozimet e rëndësishme që ka bërë opozita e bashkuar sa i përket një çështjeje madhore, për të cilat ka drafte dhe propozime konkrete mbi tryezë dhe jemi ndeshur vetëm me refuzim nga maxhoranca për propozimet tona? Ajo që është e rëndësishme për sa na përket neve, është që ne do t'i qëndrojmë fort nevojës për të gjetur zgjidhje konsensuale me asistencën e OSBE/ ODIHR- it dhe partnerëve të tjerë ndërkombëtarë, që brenda 31 majit Reforma Zgjedhore të përmbyllet dhe më pas t'u drejtohemi menjëherë betejave të tjera politike për konfirmimin e legjitimitetit të pushtetit, që është vetëm nëpërmjet zgjedhjeve", tha Oerd Bylykbashi.
REAGIMI
Në lidhje me këtë, përfaqësuesi i maxhorancës në Reformën Zgjedhore, Damian Gjiknuri, akuzoi opozitën se po tenton të kthejë në fazën zero punën e bërë deri tani të Këshillit Politik. Ndërkohë shton se opozita nuk ka përmbushur detyrimin që është depozitimi në Këshillin Politik të të gjitha drafteve. Ai kërkoi që PD- ja dhe aleatët të depozitojnë edhe propozimin se si do të funksionojë Komisioni Qendror i Zgjedhjeve. "Kemi miratuar një metodologji, për të cilën kanë qenë të gjitha palët dakord. Metodologjia thoshte se opozita jashtëparlamentare do të sillte propozime për të gjitha temat që kishim rënë dakord e që ishte përgatitur nga ekspertët. Partia Demokratike ka vazhduar dhe e ka ezauruar këtë të drejtë, pra ka sjellë propozime. Ka mbetur vetëm çështja e Komisionit Qendror të Zgjedhjeve. Kishin kohë që thonin se i kemi gati, i kemi gati. Çështja e Kolegjit Zgjedhor e cila edhe ajo është duke u diskutuar. Ndërkohë, për element të tjerë përgjithësisht kemi qenë dakord. Për çështjen e kuotave gjinore kemi akoma një diskutim. Ka një opinion të ODIHR- it që është dhënë aty dhe që mund ta marrim parasysh. Pra, janë një numër çështjesh që ekspertët i kanë punuar. Drafti është shpërndarë dhe tek ekspertët e Partisë Demokratike dhe nuk ka patur propozime nga ana e tyre", tha Damian Gjiknuri. Përgjigjen e maxhorancës, PD- ja dhe aleatët e konsiderojnë një mungesë vullneti të PS- së për të përfunduar Reformën Zgjedhore. "Për sa u përket propozimeve, çdo tendencë nga ana e maxhorancës me gojën e zotit Gjiknuri për të akumuluar pafundësisht çështje, të cilat zënë përfund njëra- tjetrën dhe nuk marrin zgjidhje, është në funksion të asaj strategjie, e cila tashmë është bërë dhe publike për të vënë situatën para faktit të kryer e për të shkuar drejt një miratimi provokativ, në mënyrë të njëanshme, me forcën e votave të kartonit, që është e kundërta e asaj që është kërkuar në kushtin përkatës për hapjen e negociatave, ku është kërkuar konsensualitet dhe këtij konsensualiteti nuk i është bërë asnjë shërbim nga ana e maxhorancës, pasi refuzimet kanë qenë kategorike", u shpreh Vasili. Megjithatë, përpos kundërshtive që kishin palët sa i përket procedimit në lidhje me draftet e depozituara nga PD- ja dhe aleatët, ata ranë dakord që mbledhja e radhës e Këshillit Politik të bëhet ditën e mërkurë, më 13 maj. Të mërkurën pritet që të diskutohet në lidhje me sistemin zgjedhor. Sistemi ishte dhe pika e fundit e rendit të kalendarit të parë të Këshillit Politik. Kujtojmë që ndryshimi i sistemit zgjedhor është kërkesë vetëm e kryetares së deputetëve të grupit demokrat në Parlament, Rudina Hajdari.