Liderët politikë takohen sot me Presidentin

Liderët politikë në Maqedoninë e Veriut pritet të mbajnë takim me Presidentin e vendit, Stevo Pendarovski, për të diskutuar për mbajtjen e zgjedhjeve të reja, me kërkesën e ish- Kryeministrit Zoran Zaev që të mbahen më 14 qershor. Zgjedhjet duhej të mbaheshin më 12 prill, por u shtynë për shkak të pandemisë së koronavirusit. Në Presidencë janë ftuar kryetarët e LSDM- së – Zoran Zaev, BDI- së – Ali Ahmeti, VMRO- DPMNE- së – Hristian Mickoski, Aleancës për Shqiptarët – Ziadin Sela, Alternativës – Afrim Gashi, Lëvizjes BESA – Bilall Kasami dhe PDSH- së – Menduh Thaçi. Në takimin e liderëve janë ftuar edhe kryetari i Kuvendit, Talat Xhaferi, dhe kryetari i Qeverisë teknike, Oliver Spasovski. Kryetari i Lidhjes Social Demokrate në Maqedoninë e Veriut, Zoran Zaev, kërkon mbajtjen e zgjedhjeve të parakohshme parlamentare më 14 qershor. Të dielën, duke prezantuar qëndrimin e koalicionit “Mundemi”, të udhëhequr nga LSDM- ja, Zaev tha se duhet shfrytëzuar stabilizimi i gjendjes me koronavirusin dhe sa më shpejtë që të jetë e mundur, të mbahen zgjedhjet për të mos lejuar “shkeljen e Kushtetutës”. Zaev argumentoi se nëse zgjedhjet lihen për në vjeshtë, ato rrezikojnë të mos mbahen, për shkak të paralajmërimeve për një valë të re të sëmundjes Covid- 19, duke rrezikuar mbetjen e vendit pa institucione të qëndrueshme dhe pa bazë kushtetuese, pasi në dhjetor mbushen katër vjet që nga mbajtja e zgjedhjeve të fundit. VMRO DPMNE- ja opozitare ka deklaruar se “shëndeti i qytetarëve është mbi të gjitha”, por kjo parti ka paraqitur si afat për mbajtjen e zgjedhjet mesin e korrikut. Edhe partitë shqiptare kanë qëndrime të ndryshme. BDI- ja kërkon mbajtjen e tyre sa më parë që të jetë e mundshme, ndërsa Aleanca për Shqiptarët, në opozitë, kërkon që zgjedhjet të mbahen pasi të hapen kufijtë, në mënyrë që e drejta e votës t’i sigurohet edhe diasporës.