Meta: Shembja e Teatrit, akt barbar dhe shkombëtarizues, nuk mund të amnistohet
"Aleanca për Teatrin fitoi. Një popull që fle në demokraci, zgjohet në diktaturë. A nuk u zgjuam në diktaturë në mes të errësirës më 17 maj?"
Presidenti Meta nuk i ka kursyer deklaratat për aktin e shembjes së Teatrit Kombëtar mëngjesin e së dielës, duke e konsideruar si një barbari dhe pjesë të një plani antikombëtar.
Duke ripublikuar në rrjetet e tij sociale disa qëndrime të intelektualëve, si Sherif Bundo, Emin Riza dhe Robert Budina, dhënë një ditë më parë në gazetën "Panorama", Presidenti Meta thotë se ajo çka ndodhi me godinën e Teatrit Kombëtar nuk mund të amnistohet. Për kreun e shtetit, kauza e Aleancës për Mbrojtjen e Tetarit nuk humbi, por fitoi, pasi shërbeu për t'i zgjuar shqiptarët. Sipas Metës, një popull që fle në demokraci, rrezikon të zgjohet në diktaturë dhe ngre pyetjen nëse kjo gjë ka ndodhur me shqiptarët mëngjesin e 17 majit. "Ajo që ndodhi në errësirën e 17 majit nuk do të amnistohet kurrë! Ndërgjegjja shoqërore dhe kombëtare u lëndua si kurrë më parë. Maska e tiranisë ra përpara të gjithë shqiptarëve dhe e gjithë bota e vërtetë demokratike u shokua. Kurrë një ngjarje nga Shqipëria s'do prodhonte një jehonë të tillë dhe negative, që nuk shlyhet më dhe as harrohet derisa mbi rrënojat e 17 majit të vendoset drejtësia. Aleanca për Mbrojtjen e Teatrit nuk humbi, por fitoi një kauzë edhe më të madhe, duke i ndihmuar të gjithë shqiptarët e përgjumur për t'u zgjuar e bashkuar para se tirania t'i shembë secilit shtëpinë e tij, si banorëve të Unazës së Re. Të gjithë shqiptarët e ndershëm u ndjenë të dhunuar pabesisht dhe poshtërsisht, pasi Teatri ishte tempulli i tyre i përbashkët. Të gjithë u ndjenë edhe në faj e borxh për heronjtë dhe heroinat, që e mbrojtën atë për dy vjet e gjysmë me sakrifica të patreguara dhe nën presione të gjithanshme. Tani kauza e tyre është e të gjithëve ne dhe nuk do të ndalojë deri në shembjen e tiranisë dhe rindërtimin e Teatrit. Mirënjohje të përjetshme artistëve, të cilët zgjuan qytetarinë. Një popull që fle në demokraci, zgjohet në diktaturë. A nuk u zgjuam në diktaturë në mes të errësirës më 17 maj?" - shkroi Presidenti. Më tej, Meta iu bashkua shqetësimeve të akademikut Emin Riza dhe profesorit Sherif Bundo për atë që i ndodhi godinës historike të Teatrit. U jam shumë mirënjohës të gjithë specialistëve dhe ekspertëve, si akademiku Emin Riza, të cilët me profesionalizëm, përkushtim, por veçanërisht me dashurinë e pasionin e tyre për kulturën tonë kombëtare dhe trashëgiminë e pazëvendësueshme, vazhdojnë të provojnë çdo ditë se shkatërrimi i Teatrit Kombëtar është një akt barbar dhe i programuar shkombëtarizues. Prandaj është i paamnistueshëm përgjithmonë. I dashur profesor Bundo, ndaj me ju të njëjtat shqetësime dhe kam bindjen e plotë se shkatërrimi i Teatrit Kombëtar nuk ishte thjesht dhe vetëm një akt cubash, antikushtetues dhe i paligjshëm, por një akt i programuar shkombëtarizues", reagoi Presidenti Meta në rrjetet sociale.