Ish- kreu i Policisë Vlorë, Jaeld Çela, lihet në burg
Procesi ndaj ish- zyrtarëve nuk ka nisur ende të shqyrtohet
Gjykata e Posaçme e Apelit ka zhvilluar dje seancën për rivlerësimin e masës së sigurisë "Arrest me burg", për ish- drejtorin e Policisë së Vlorës, Jaeld Çela. Tri ditë më parë, Çela vendosi që të vetëdorëzohej në Drejtorinë e Policisë së Tiranës, ndërsa qëndroi në arrati rreth dy vjet. Pas vetëdorëzimit, kreu i Policisë së Vlorës ka mohuar akuzat e ngritura ndaj tij. Sipas avokatit Petrit Ismaili, Jaeld Çela ka qenë i përfaqësuar në seancat gjyqësore që zhvilloheshin ndaj tij dhe se nuk mund të quhej arratisje e tij. Në një reagim për mediat pas seancës gjyqësore në Gjykatën e Posaçme të Apelit, avokati tha se Çela është dorëzuar në kohë, pasi tani janë rrëzuar të gjitha akuzat e Prokurorisë. "Dorëzimi është bërë në kohën e duhur. Gjithçka është bërë në momentin kur kemi hedhur poshtë të gjitha akuzat e Prokurorisë, ndaj dhe është vetëdorëzuar. Ai kurrë nuk ka qenë në arriti, por ka ndjekur procesin gjyqësor", u shpreh Ismaili. Seanca e djeshme u zhvillua me dyer të mbyllura, ndërsa më datë 28 maj do të jetë seanca e radhës për ishministrin Saimir Tahiri dhe ish- drejtorin e Policisë Vlorë, Jaeld Cela. Ndërkohë, procesi gjyqësor i dy zyrtarëve të tjerë të Policisë së Vlorës, Sokol Bode dhe Gjergj Kohila, është ndarë nga çështja e ish- ministrit Tahiri dhe është pezulluar për 1 vit, me arsyen se 2 ish- zyrtarët e Policisë së Vlorës vazhdojnë të qëndrojnë në arrati. Trupa gjykuese në Apel që ka marrë në shqyrtim dosjen e ish- ministrit Tahiri është e përbërë nga gjyqtarët Albana Boksi, Nure Dreni dhe Nertina Kosova. Ish- drejtuesi i lartë i Policisë u hetua nga Prokuroria e Krimeve të Rënda ( tashmë funksionon si SPAK) për trafik droge dhe favorizim të grupit kriminal të vëllezërve Habilaj, gjatë viteve 2015- 2016, kur ai drejtonte Policinë Vlorë, së bashku me ish- Ministrin e
Brendshëm, Saimir Tahiri. Gjykata për Krimet e Rënda e deklaroi atë të pafajshëm për këto akuza, por e shpalli fajtor për "Shpërdorim detyre". Për këtë, ai u dënua me 5 vite burg, por që me gjykim të shkurtuar, dënimi përfundimtar i shkoi në 3 vite e 4 muaj.