Megaoperacion antidrogë në Kukës, arrestohen trafikantë dhe policë
Në pranga ka rënë edhe vëllai i kreut të Bashkisë Fushë- Arrëz. Grupi kriminal i shtrirë nga Veriu në Jug, kultivonin parcela me kanabis
Nëntëmbëdhjetë persona janë arrestuar pas një megaoperacioni të koduar "Shën Mëri 2020". Ky operacion u zhvillua nga Drejtoria e Policisë Kukës, në bashkëpunim me drejtoritë vendore të Policisë së Lezhës, Shkodrës, Tiranës dhe Gjirokastrës.
Hetimi dyvjeçar i nisur nga Policia Kukës kudër aktivitetit kriminal të kultivimit dhe trafikimit të lëndëve narkotike, çoi në pranga edhe punonjës të Policisë së Shtetit. Përveç personave të arrestuar Policia ka shpallur në kërkim edhe tre persona të tjerë, ndërsa është sekuestruar edhe një armë automatike kallashnikov. Mes të arrestuarve është dhe vëllai i kryebashkiakut të Fushë- Arrëzit, si dhe 2 punonjës policie, të cilët dilnin garant për mbjelljen e parcelave me kanabis. Punonjësit e Policisë që u vunë në pranga si të përfshirë në këtë aktivitet kriminal me lëndë narkotike janë Arben Kalaja, polic në drejtorinë e Tiranës, si dhe Ramiz Cenaj, polic në komisariatin e Policisë së Kukësit. Gjithashtu, është pezulluar nga detyra Naim Kadiu, një oficer i Policisë Gjyqësore, po në komisariatin e Policisë Kukës. Mes të arrestuarve është dhe Arben Tuci, vëllai i kryetarit të Bashkisë së Fushë- Arrëzit, Fran Tuci. Prokuroria ka dyshime se kreu i grupit është shtetasi Kreshnik Murataj, i cili është konstatuar në disa prej përgjimeve telefonike. Një rol të rëndësishëm në këtë grup kishte dhe Sali Kovaçi, i cili merrej me kultivimin e parcelave me kanabis.
OPERACIONI
Në një deklaratë për mediat, Policia bëri të ditur se 19 persona u vunë në pranga, ndërsa u sekuestrua një armë zjarri kallashnikov. Në zbatim të Planit të Veprimit të Drejtorisë së Përgjithshme të Policisë së Shtetit, për marrjen e masave operacionale në terren, me qëllim parandalimin, evidentimin dhe goditjen e veprimtarisë kriminale në fushën e kultivimit dhe trafikimit të lëndëve narkotike, Drejtoria Vendore e Policisë Kukës, në bashkëpunim me strukturat e lëvizjes operacionale FLO, në koordinim nga Departamenti i Policisë Kriminale, si dhe me SHÇBA- në dhe nën Drejtimin e Prokurorisë së Rrethit Gjyqësor Kukës, në orët e para të mëngjesit finalizoi me sukses operacionin policor të koduar "Shën Mëri 2020", si rezultat i të cilit u bë ekzekutimi i masave të sigurisë për 19 shtetas, për veprën penale "Kultivimi i bimëve narkotike, në bashkëpunim". Gjithashtu në kuadër të operacionit u bë shpallja në kërkim e 3 shtetasve: B. K., Z. M. dhe B. C. Nga strukturat e SHÇBA- së pranë Drejtorisë Vendore të Policisë Kukës janë arrestuar dy punonjës policie, shtetasi A. K., 49 vjeç dhe shtetasi R. C., 59 vjeç, për veprën penale "Shpërdorimi i detyrës". Dokumentimi i këtij aktiviteti kriminal është bërë pas një hetimi disamujor nga strukturat e DVP Kukës në bashkëpunim me SHÇBA- në, nën drejtimin e Prokurorisë së Rrethit Gjyqësor Kukës, duke aplikuar format dhe metodat speciale të hetimit, në kuadër të procedimit penal të nisur në vitin 2018, për parandalimin e kultivimit të bimëve narkotike. Ndërsa për oficerin e Policisë N. K., u mor masa e pezullimit nga detyra.