Ish- studentët: Pedagogu modern, përfaqësues i shquar i shkencës mjekësore shqiptare

Prof. Maks Cikuli nuk ishte një pedagog i thjeshtë. Studentët e tij, sot emra të shquar në mjekësi, shpalosin kapacitetin e rrallë intelektual të profesorit të tyre, humorin fin dhe kulturën që transmetonte. Prof. Xheladin Çeka dhe prof. Mimoza Lezha tregojnë se si përpara shumë vitesh ecnin me kilometra të tëra nga Sanatoriumi në fakultet për të kapur orën e profesor Maksimit. Ata e mbajnë mend si profesori që kurrë nuk e ngriti zërin. Kundrejt moshës së tij të re, prof. Cikuli bindte me argumentin e fjalën e urtë si dhe konceptet moderne që përcillte në komunikim.

Prof. Xheladin Çeka Prof. Mimoza Lezha Humbje e madhe, që nuk përshkruhet me fjalë! Keqardhje që transmetohet veçse me gjuhën e shpirtit! Profesori ynë brilant, i cili edhe kur ishte pedagog i ri, i lëndës më të rëndësishme të Fakultetit të Mjekësisë, Sëmundjeve të Brendshme ( që në atë kohë quhej Terapi), transmetonte cilësitë më të shkëlqyera të brezit që përfaqësonte. Gjimnazisti i Medaljes së Artë dhe studenti i një Medalje tjetër të Artë. Njohësi perfekt i disa gjuhëve të huaja. Ne, ish- studentët e Prof. Maksim Cikulit, kuptuam se pedagogu ynë prezantohej me një kapacitet intelektual të rrallë, me shumë kulturë, me humor fin, tepër modest dhe shumë shoqëror. Ne që e kishim pedagog kujdestar, “thyenim këmbët” për të ardhur nga Sanatoriumi në fakultet për të ndjekur “orën politike”, së cilës profesori ynë i jepte natyrën e orës kulturore dhe qytetare. Cilësi që i prezantonte edhe në aktivitete të tjera, si: paradat dhe stërvitjet ushtarake, aktivitete të ndryshme, në aksionet në hekurudha, apo në ndihmë të bujqësisë... Prof. Maksi edhe këtu bënte diferencën me kolegët, që jo rrallë binin në “grackat” e kohës.

Prof. Maksim Cikuli u specializua për një kohë katërvjeçare në universitetin Paris V, në fushën e Gjenetikës dhe me kthimin në Shqipëri, organizoi dhe ngriti Shërbimin e Gjenetikës Mjekësore dhe atë të Këshillimores Gjenetike, që e drejtoi për shumë kohë, gjatë punës si pedagog i kësaj lënde të re, që ishte futur ndërkohë edhe në kurrikulën e Fakultetit të Mjekësisë.

Prof. Maksim Cikuli realizoi kualifikimet shkencore, për Kandidat i Shkencave, Docent dhe Profesor, ndër të parët e brezit të tij që u specializua jashtë shtetit, si në: Francë, Itali, Austri etj. Dha kontribut të veçantë për veprimtarinë shkencore në Fakultetin e Mjekësisë, si inspektor i kualifikimit shkencor dhe shef departamenti. Edhe më tepër si drejtor i QSUT, ministër i Shëndetësisë dhe deputet i Kuvendit të

Shqipërisë. I spikatur për vlerat e tij brenda vendit dhe në përfaqësimin e shëndetësisë shqiptare në organizmat ndërkombëtarë. Autoritet i respektuar dhe vlerësuar nga kolegët europiane e më gjerë, për konceptet moderne që mesazhonte në takime e veprimtari.

Si ish- studentë të prof. Maksim Cikulit dhe si kolegë, e vlerësojmë si një nga përfaqësuesit më të shquar të shkencës mjekësore shqiptare dhe i pedagogjisë së shkencave mjekësore shqiptare të gjeneratës së e re moderne; i pajisur me njohuri të thella shkencore, pedagog me kulturë të gjerë, pedagog modern shumë i dëshiruar për leksionet nga studentët; shumë bashkëpunues në laborator me kolegë. Profesori që kurrë nuk e ngriti zërin, por bindi me argumentin, me fjalën e urtë, që shpesh binte ndesh edhe me moshën e tij të re.

Prof. Maksim Cikuli prezantonte edhe një tjetër cilësi, të rrallë. Ai ishte kurdoherë nga e mira, nga arsyeja, identifikimi i vlerave. Personaliteti tepër tolerant, që kurë nuk prezantoi atribute partitizmi dhe ekstremizmi politik, por cilësi profesionisti dhe intelektuali. Me fjalën e tij të urtë, “shuante” keqkuptime apo keqinterpretime. Njeriu modern, që demokratin e kishte në të tijën shpirtmirësi!

Prof. Maksim Cikuli, burri i urtë, fjalëpak, punëshumë, modeli i njeriut të mirë, qytetari i klasit të parë, fisniku, personaliteti i Mjekësisë Shqiptare dhe i Pedagogjisë së Shkencave Mjekësore shqiptare, miku ynë! Maksi do të na mungojë! U prehtë në paqe!

Si ish- studentë të prof. Maksim Cikulit dhe si kolegë, e vlerësojmë si një nga përfaqësuesit më të shquar të shkencës mjekësore shqiptare dhe të pedagogjisë së shkencave mjekësore shqiptare të gjeneratës së re moderne; i pajisur me njohuri të thella shkencore, pedagog me kulturë të gjerë, pedagog modern shumë i dëshiruar për leksionet nga studentët