Këshilla është që të gjithë ata që kanë pasur vështirësi frymëmarrjeje, pasi kanë kaluar koronavirusin si sëmundje, të bëjnë kontroll te kardiologu, kryesisht për ata të sëmurë që e kalojnë në shtëpi këtë sëmundje apo ata që mendojnë se e kanë kaluar.
Pandemia e COVID- 19 ka krijuar shqetësim të madh në mbarë njerëzimin dhe në veçanti të qarqeve mjekësore në të gjitha hallkat, qysh nga klinika, pra mjeku që bën vizitat, sidomos infeksionistët, epidemiologët që janë në vijën e parë të luftës me këtë armik të panjohur shumë të rrezikshëm, duke vazhduar te heronjtë në laboratorë për zbulimin e mikrobit, zhvillimin e provave të mundimshme të papërsëritura për zbulimin e vaksinës mbrojtëse të mbarë njerëzimit, që natyrisht që do të hyjë në histori. Mundësitë shkencore janë shumë të mëdha për arritjen e suksesit, nuk janë si në 1918, kur bota u përball me gripin spanjoll, i cili shkaktoi 50 milionë viktima.
Distancimi njerëzor dhe mjekimi simptomatik, kujdesi për veten e të tjerët është e vetmja mënyrë e shërimit derisa të njihet ilaçi i duhur, duke provuar shumëllojshmërinë e barnave të vjetra e të njohura, duke paraqitur me të gjithë mediat deri edhe te perfuzioni i plazmës së të sëmurëve që kaluan COVID- 19, në të cilën ka antitrupa mbrojtës.
Qëllimi i këtij shkrimi është që t’i japim shenjat dhe si ndikon ky virus mbi zemrën apo enët e gjakut, kudo qofshin.
Deri tani, pra në kohën kur u bë i njohur ky virus për të cilin po flasim, njihej gjerësisht ndikimi i viruseve të çfarëdo lloji si ai i gripit, influencës ose viruseve gastro- intestinale mbi zemrën, duke sulmuar muskulin e zemrës e duke dhënë atë që në mjekësi quhet miokardi apo prekje e cipave të zemrës perikardit, duke dhënë reaksion të tij apo prurje të valvulave të zemrës me pasojat e saj, siç është insuficienca kardiake, mundet e shoqëruar me çrregullime të ritmit të zemrës, duke rënduar shumë gjendjen e të sëmurëve me vështirësi në frymëmarrje, sesa fryrjen e këmbëve me imobilitet të rëndësishëm të tij. Komplikacione të gripit janë edhe në mushkëri me pneumoni ose të cipave të mushkërive ( pleurit), apo dëmtimet në tru ose cipave të trurit ( meningjit), por edhe e palcës së kurrizit që prish formulën e gjakut me pasojat që rrjedhin prej saj.
Këto ishin të njohura për çdo prekje të viruseve të shfaqura deri tani, e studiuar mirë duke u mbrojtur prej shumë nga ato me prodhimin e vaksinave, që janë mikrobe të zhytura, të cilat, duke u futur në trupin e njeriut, krijojnë antitrupa mbrojtës të shëndetit që përmendin shumë këtë kohë në infektimin e pandemive nga koronavirusi, që emrin e ka shumë domethënës, por agresivitetin e dëmin e ka shumë të madh dhe grupe të mëdha mjekësh, biologësh të specialiteteve të ndryshme janë në punë të vazhdueshme dhe herëherë të rrezikshme për të zbuluar vaksinën ose mjekimin e duhur të përshtatshëm, por edhe disa herë arsyeja mjafton që të ketë sukses në kurimin e saj, edhe pse në mënyrë empirike jo të certifikuar.
Po çfarë ndodh kur virusi Covid- 19 i panjohur sulmon në mënyrë agresive të lartë zemrën?
Ky aspekt është i panjohur dhe shkenca mjekësore deri tani studion vetëm pasojat e sulmit të tij mbi zemër, duke qenë shumë armiqësor si antigjen. Së pari, sulmon muskulin e zemrës duke e dobësuar atë dhe zmadhuar, duke i atribuuar insuficiencë kardiake që dëmtohet më tepër me shfaqjen e aritmive të formave të ndryshme ( çrregullime të ritmit të zemrës).
Duhet të kujtoj që insuficienca kardiake, në 50 për qind të rasteve shkakton vdekjen e pacientëve në harkun e 4- 5 viteve dhe n. q. s shtohet ky virus agresiv, çfarë ndodh?
Ndërkohë që insuficienca kardiake në grada të ndryshme ka qenë së pari nga shkaqe të tjera. Në këto kushte, këta pacientë duhet të tregojnë kujdes më të madh.
Prekja e cipave të zemrës që quhet perikardit në faza të ndryshme është pasojë e koronavirusit.
Gjithçka që thamë më lart, këta të sëmurë me Covid- 19, sidomos ata me dispne, që është një nga shenjat kryesore të saj, duhet të kontrollohen edhe nga zemra. EKG dhe EKO e zemrës janë kryesore, plus analiza plotësuese të gjakut, të gjitha këto të çojnë te klinicisti kardiolog. Nuk ka përqindje të saktë sa është e prekur zemra nga COVID- 19.
Natyrisht, do të ketë studime të mëvonshme, pasi të kalojë kjo furtunë pandemie dhe njerëzit e shkencës njerëzore do të dalin në përfundime të sakta, pasi të shpëtojnë jetët e njerëzve. Fakti i ri në këtë sëmundje virale, pra nga COVID- 19, është shfaqur tromboza, siç quhet në mjekësi, në arterie të ndryshme të trupit të njeriut. Po ashtu, edhe në trombozat e arterieve të mushkërive ( trombozë pleurale), por edhe në pjesë të tjera të trupit, që mendohet se çrregullon zinxhirin e koagulimit të gjakut apo dëmton endotelin e arterieve ( pjesa e brendshme) dhe nuk shfaqet në sistemin venoz.
Të gjitha këto dyshime pritet të marrin shpjegim të vërtetë në të ardhmen. Atëherë të presim, sepse duhet të rregullohet mjekimi edhe në antikoagulantë ( kundër mpiksjes së gjakut). Të gjitha këto janë përgjithësime të nxjerra nga botime e shkrime të deklaruara në shtypin e huaj apo në media, si gjithmonë u referohemi të përparuarave në fushën e vështirë të kërkimeve mjekësore. Po pyetja është se çfarë duhet të bëhet pasi kalon sëmundja, që s’dihet akoma kur?!
Këshilla është që të gjithë ata që kanë pasur vështirësi frymëmarrjeje, pasi kanë kaluar koronavirusin si sëmundje, të bëjnë kontroll te kardiologu, kryesisht për ata të sëmurë që e kalojnë në shtëpi këtë sëmundje apo ata që mendojnë se e kanë kaluar.
Në përfundim, ka mendime të ndryshme si karantina vepron për gjendjen psikologjike, por përgjithësisht mendohet që vepron negativisht. Nga ana tjetër, një gjendje shpirtërore dhe mentale jo e mirë nuk bën gjë tjetër, veçse e rëndon gjendjen e pacientit të infektuar.