Propozimi i SHBA për zgjedhjet, Gjiknuri: Nuk mund të bëhet
“Nëse ne hapim lojën e sistemit në ato mënyra që themi, do të shpërbëjmë Kushtetutën e Shqipërisë”
GJIKNURI
“Po të hapim ne lojën e sistemit në ato mënyra që themi, do të shpërbëjmë Kushtetutën. Sepse kur ndryshohet sistemi zgjedhor, nuk ndryshohet vetëm mënyra sesi përkthehen votat në mandate, por ndryshohen edhe raportet që ka qeveria me Parlamentin
HAJDARI
“Nuk duhet ta bëjmë vetëm për BE- në, por edhe për veten. Për t’u rikthyer shqiptarëve sovranitetin e Parlamentit. Çdo gjë në këtë vend ka marrë fund, sepse politika shqiptare ka marrë peng vendin për vite me radhë.
Përfaqësuesi i Partisë Socialiste në këshillin Politik të Reformës Zgjedhore, Damian Gjiknuri, ishte i pari që përjashtoi mundësinë e ndryshimit të sistemit zgjedhor sipas sugjerimit të ambasadës së Shteteve të Bashkuara të Amerikës.
Nga poltroni i Parlamentit ditën e djeshme, Gjiknuri u shpreh se ky nuk është momenti i përshtatshëm politik për të ndërmarrë një nismë të tillë. Sipas Gjiknurit, ndryshimi i sistemit kërkon ndryshime të thella edhe në Kushtetutën e Shqipërisë. “Duhet të kuptohet se sistemi nuk është një listë dëshirash. Nuk jemi këtu për të bërë themelet e para të Republikës së re, se kështu thoshte dhe ai ‘ Republika e re’. Si do ta bëjmë Republikën e re? Myslimi ka një ide të caktuar për Republikën e re. Po të hapim ne lojën e sistemit në ato mënyra që themi, do të shpërbëjmë Kushtetutën e Shqipërisë. Sepse kur ndryshohet sistemi zgjedhor, nuk ndryshohet vetëm mënyra sesi përkthehen votat në mandate, por ndryshohen edhe raportet që ka qeveria me Parlamentin, ndryshohet edhe raporti që ka Presidenti me Parlamentin, ndryshohen edhe raportet që mund të kenë organet e drejtësisë me Parlamentin, sepse kemi të bëjmë me një kompozim krejt të ndryshëm”, tha Gjiknuri. Sipas deputetit të PS- së, ndryshimi i sistemit politik kërkon një klimë më të qetë politike. “Nëse e hapim lojën e sistemit, nuk po them që nuk ka ardhur momenti, por ne nuk mund ta zgjidhim tani. Nuk zgjidhet kjo kur gjysma e elektoratit është në rrugë, një pjesë tjetër këtu thotë ‘ dua unë se kam votat dhe të bllokoj’. Mbi të gjitha, ajo do një klimë të qetë. Bëhet fjalë për themelet e Republikës së Shqipërisë. Dikush mund të thotë ‘ po si e bëtë ju në vitin 2008’. Po atëherë pati një konsensus të gjerë nga forcat kryesore politike”, tha Gjiknuri. Përfaqësuesi i PS- së në Këshillin Politik për Reformën Zgjedhore ironizoi duke thënë se në Shqipëri nuk është problemi te sistemi, por te mospranimi i humbjes. “Në fakt, zgjedhjet dhe problemi për zgjedhjet nuk ka qenë në vetvete as sistemi dhe as fakti nëse ka pasur zgjedhje demokratike Shqipëria. Ka qenë gjithmonë mospranimi i humbjes nga humbësi dhe fillimi i vënies së sistemit nën stres, duke kërkuar vazhdimisht mosnjohje zgjedhjesh dhe më vonë ndryshime të vazhdueshme të ligjit elektoral. Fatkeqësisht, ligji elektoral është kthyer si ajo pëlhura e Penelopës që nuk mbaron kurrë. Fatkeqësisht, unë kam qenë herë protagonist e herë aktor, herë aktiv e herë pasiv, në një proces reformimi të ligjit, proces i cili po kthehet në pambarim. Kjo, jo për shkak se ligji ka qenë i keq, as për shkak se Shqipëria nuk ka ditur të bëjë zgjedhje, por më shumë për arsye se humbësi nuk pranonte fatin dhe verdiktin e popullit”, vijoi Gjiknuri.
AKUZAT Deputetja Rudina Hajdari reagoi ashpër pas fjalës së deputetit të PS- së, Damian Gjiknuri, duke e akuzuar politikën shqiptare se i ka marrë peng shqiptarët prej 30 vitesh. Ndërkohë, ajo tha se tashmë po investohet edhe ambasada e SHBA- së për të sugjeruar që t’i kthehet fuqia qytetarit, që është zgjedhja. “Reforma Zgjedhore është detyrim kombëtar dhe i detyrohemi gjeneratës së re për të qenë aty ku kemi dashur, në gjirin e BE- së. Nuk duhet ta bëjmë vetëm për BE- në, por edhe për veten. Për t’u rikthyer shqiptarëve sovranitetin e Parlamentit. Çdo gjë në këtë vend ka marrë fund, sepse politika shqiptare ka marrë peng vendin për vite me radhë. Ne si opozitë parlamentare po avokojmë për ndryshim sistemin zgjedhor. Pse nuk e mbron një nga PS- ja çështjen e Teatrit. Ju mban me litar prej fyti Rama. Kam avokuar dhe ia arritëm ditës dhe ambasada amerikane, bashkë me ndërkombëtarët, po çojnë idetë përpara. Duhet ndryshim sistemi se i ka marrë peng qytetarët politika e vjetër”, deklaroi deputetja demokrate. Ndërkohë, kjo e fundit i bëri ftesë edhe PD- së e aleatëve që të rikthehen në tryezën e Reformës Zgjedhore. “I bëj thirrje opozitës jashtëparlamentare të rikthehet në tryezë. Mos e lini Shqipërinë në dorë të socialistëve, mos i lini bashkitë në dorë të socialistëve. Hajdeni në Parlament të luftojmë”, tha Hajdari.