AMT paralajmëron protesta pas përfundimit të mbledhjes së firmave
Aleanca Për Teatrin ka paralajmëruar një tubim të madh në "Bulevardin Dëshmorët e Kombit" pasi të përfundojë mbledhjen e firmave për peticionin ku kërkohet ndërtimi i Teatrit Kombëtar, siç ishte dhe atje ku ishte. Regjisori Robert Budina nga Kukësi tha se marshimi gjigant do të jetë për t'i treguar Kryeministrit Rama dhe Europës që Shqipëria futet në BE me kulturë. "Mbasi të mbledhim firmat, do organizojmë një marshim gjigant në ' Dëshmorët e Kombit', për t'i treguar Ramës dhe Europës që Shqipëria futet në BE me kulturë. Sepse do ngjallë besimin e të rinjve. Kemi 2 vjet e 3 muaj që protestojmë. Demokracia fitohet në shesh. Nuk është politika për të fituar pushtet, por për të fituar të drejtën. Mos e shihni si luftë për pushtet çdo post drejtues, por duhet të kërkoni llogari", tha Budina. Ndërkohë, sipas regjisorit, tashmë ka ardhur momenti që të ngrihet instrumenti i qëndresës për të protestuar kundër vendimeve të padrejta të qeverisë. "Sot duhet të bashkohemi. Të lëmë ndasinë. Është një pushtet që po fiton në mënyrë të paskrupullt. A kemi kurajë ta shohim njëri- tjetrin në sy? Të krijojmë institucionin e rezistencës, çdo ditë protestë. Duhet ta shohim në sy të vërtetën. Më mirë se kultura. Kemi ardhur të protestojmë dhe nesër nuk do na shihni të zëmë ndonjë llokëm, por na dhemb demokracia", tha Budina.
NERITAN LIÇAJ
Aktori Neritan Liçaj ka folur nga sheshi i Pallatit të Kulturës në Kukës "Hasan Prishtina", gjatë protestës ku janë mbledhur edhe firmat për peticionin për rindërtimin e Teatrit Kombëtar. Liçaj thotë se kuksianët kanë mësuar të luftojnë serbin dhe çdo vështirësi. "Iu kanë mësuar të luftoni serbin, çdo vështirësi. Jetën nuk e kemi prej politikës, por prej prirjeve, fisit, familjes e gjakut. Sa të kemi zemrën e pastër dhe mendjen e kthjellët nuk ka lindur ai qen bir qeni që Të na mposhtë. Të gjithë po vuajmë nga abuziviteti dhe korrupsioni", tha Liçaj.