“Të dielat pa makina”, Fuga kundër nismës së Ramës
Bylykbashi: Kufizimi i lirive pas 24 majit është antikushtetues
Akademiku Artan Fuga jo pa ironi ka komentuar masat e premtuara nga Kryeministri Rama, sipas të cilit, nga muaji tetor e deri në mars të vitit të ardhshëm, të dielat do të jenë pa makina.
Me një shënim në faqen e tij në "Facebook", Fuga i përgjigjet Kryeministrit me një propozim: "Që nga 15 qershori dhe deri ditën e gjyqit të fundit, nisur nga përvoja e muajit të shenjtë kur agjërohet, t'u ndalohet shqiptarëve të hanë dhe të pinë, veç orëve të caktuara, t'u ndalohet edhe seksi, në mënyrë që ata t'u kushtohen gjithë jetës mendimeve të mira, solidaritetit, shpirtërisht të pastrohen dhe kështu të … vetëpastrohen! Pra, atë që as Allahu i madh dhe i gjithëmëshirshëm, lartësuar qoftë emri i tij, nuk na e ka kërkuar!", shkruan Fuga.
BYLYKBASHI
Ish- deputeti i PD- së, Oerd Bylykbashi, përmes një statusi në "Facebook", shprehet se që nga dita e sotme e Fiter Bajramit, "gjendja e ? fatkeqësisë natyrore" dhe masat e jashtëzakonshme të Kryeministrit Edi Rama janë antikushtetuese. "Rimerrni të drejtat tuaja! Që nga e diela sotme e Fiter Bajramit, ' gjendja e ? fatkeqësisë natyrore' dhe masat e jashtëzakonshme të Kryeministrit Edi Rama janë ANTIKUSHTETUESE. Mbajtja e këtyre masave përtej 23 majit nuk ka vlerë kushtetuese, sepse Parlamenti nuk mund ta zgjaste gjendjen e fatkeqësisë natyrore më shume se një muaj pa një vendim të ri. Kufizimi i LIRISE SE LEVIZJES së shqiptareve dhe të gjitha lirive të tjera nga Kryeministri Rama, që nga dita e sotme, 24 maj, ? e në vazhdim, është antikushtetues", shkruan Bylykbashi. Teksa citon nene të Kushtetutës, Bylykbashi shprehet ndër të tjera se, qeveria duhej të kërkonte shtyrje të re 30- ditore më 23 maj, të raportonte në Parlament për masat e ndërmarra nga 24 prilli ? deri më 23 maj, të dëshmonte sa efikase ishin ato dhe pse duhej zgjatur edhe me 30 ditë të tjera gjendja e fatkeqësisë natyrore dhe kufizimi i lirive. "Kjo është arsyeja e afatit kushtetues 30- ditor, llogaridhënia e qeverisë dhe jo tekat e Ramës në orën 22: 00 të natës në ' Facebook'. Parlamenti ka detyrimin që t'ju mbrojë të drejtat nga qeveria, por harrojeni që ky Parlament si shtupë lecke në duart e Edi Ramës t'ju mbrojë", përfundon shënimin e tij në "Facebook" Bylykbashi.
BIZNESI
Dietologia Blerina Bombaj ka dalë kundër nismës së Kryeministrit që të dielat, nga tetori deri në mars, të jenë pa makina. Bombaj thotë se restorantet në periferi punojnë në fundjavë dhe nëse hiqen makinat, atëherë me çfarë do të paguhen punëtorët, rrogat, taksat, uji, ushqimi i gjësë së gjallë? "Ok, të mbyllen fundjavat! Super, s'ka më mirë. Kam vetëm një pyetje të vockël: Këto restorantet që punojnë në fundjavë në periferi, që kanë 3 muaj pa punë, që kanë të mbjellat plot, që restauruan dhe u shpenzuan që të hapin denjësisht, që u hapën e nxorën stafin në punë, me çfarë do paguajnë rrogat, taksat, ushqimin e gjësë së gjallë, ujin, plehun, leshin dhe preshin??!!!", shkruan Bombaj.
LSI
Nënkryetari i LSI- së, Petrit Vasili, u ka bërë thirrje shqiptarëve që të mos binden. Me anë të një video në rrjetet sociale, Vasili u drejtohet qytetarëve me thirrjen që të dielën e parë të tetorit të ndezin makinat e të dalin. "Ju kam parë të gjithëve të preokupuar për çmendurinë e radhës së Kryeministrit që do bllokoka makinat për ditën e diel nga tetori deri në mars. Ju e patë se si Kryeministri ynë, që ka filluar flet me ojna e përkëdhelet e dridhet në videot që bën, u përpoq të tregonte se meqenëse u zmbraps turpshëm në ndalimin e tij heretik, të mallkuar për të penguar faljen e Bajramit, u përpoq të marrë hak e të shpikë këtë mbyllje 5- mujore për të gjithë të dielat. Kam një lutje për të gjithë ju miqtë e mi, nuk ka nevojë t'i ktheni përgjigje këtij të çmenduri, mos lodhni veten as me argumentet, nuk kupton, ka vetëm një përgjigje. Të gjithë bashkë që ditën e parë që do guxojë ta bëjë këtë gjë, të marrim makinat edhe ata që nuk e kishin në plan për t'i marrë e të dalim të gjithë së bashku në rrugë. Ç'do bëjë ky i marrë? Do arrestojë dhjetëra e mijëra qytetarë në një ditë? Asgjë s'do bëjë, do fusë bishtin në shalë e do ikë. Të dalë me makinë të dielën e parë të tetorit e të shohim çfarë do bëjë ky frikacak, si do tërhiqet turpshëm, në rast se do jetë në atë karrige deri në tetor", shkruan Vasili.