"Policët nuk janë pronë e eprorit, shkelje e Kushtetutës"
Sindikata, kundër projektligjit për ata që mbushin 55 vjeç
Përmes një letre drejtuar kryetarit të Kuvendit, Gramoz Ruçi, sindikata shprehet se nuk është marrë mendimi i tyre për hartimin e projektligjit, ndërsa kërkojnë disa ndryshime. Gjithashtu, kundërshton përcaktimin që punonjësi i Policisë, i cili me këtë ligj del në pension, të ketë detyrimin të kryejë 700 orë punë dhe pikën tjetër, e cila i jep të drejtën një titullari, pra, drejtuesit të institucionit, që të ketë vendimmarrje për të nxjerrë në pension një vartës mbi 55 vjeç. Më tej, duke iu drejtuar kryetarit të Kuvendit, sindikata e konsideron si dënim me ligj faktin që qeveria dhe Parlamenti kërkojnë që ata të bëjnë punë të detyruar, për shkak se kanë mbushur moshën 55 vjeç dhe kanë 30 vite karrierë në Polici. Sipas sindikatës, policët nuk mund të jetë pronë e eprorit dhe puna e detyruar është shkelje e Kushtetutës.
LETRA
Projektligji "Për trajtimin Financiar të Punonjësve të
Policisë së Shtetit, Gardës së Republikës dhe Shërbimit për Çështjet e Brendshme dhe Ankesat, në Ministrinë e Brendshme pas ndërprerjes së marrëdhënieve të punës", që ka kaluar nga Komisioni Parlamentar i Sigurisë, për mendimin tonë, si Sindikatë e Punonjësve të Policisë së Shtetit, është paraqitur pranë jush, për ta kaluar në seancë plenare me disa shkelje, si Kushtetuese, ashtu edhe ligjore, si më poshtë: Sindikata e Punonjësve të Policisë së Shtetit, si përfaqësuese e vetme e punëmarrësve në Policinë e Shtetit, me statusin e drejtpërdrejtë të grupit të interesit, nuk i është marrë asnjë mendim për këtë projektligj dhe dijeni kemi marrë vetëm me publikimin e tij në faqen zyrtare të qeverisë. "Duke parë pamundësinë tonë për të ndikuar sadopak në hartimin e ndryshimin e këtij projektligji kërkojmë: a) Heqjen e pikës 1 e 2 të nenit 7 të Projektligjit, ku shkruhet; ' Detyrimet e përfituesit, sipas këtij ligji', se: "Punonjësit e Policisë… kanë detyrimin të aktivizohen në shërbim deri në 700 orë në vit dhe gjatë kësaj periudhe, kanë të njëjta të drejta e detyrime si punonjësit e tjerë të shërbimit përkatës, me përjashtim të trajtimit financiar", ndërsa; Pika 2 e këtij neni, shpreh se ' Mosplotësimi i detyrimit të këtij neni është shkak për ndërprerjen e trajtimit financiar sipas këtij ligji'?! Projektligji, po u miratua, ashtu siç ka kaluar i miratuar nga Komisioni Parlamentar i Sigurisë, shkel haptazi nenin 26 të Kushtetutës, Kreu II, Liritë dhe të Drejtat Vetjake, ku thuhet se: "Askujt nuk mund t'i kërkohet të kryejë një punë të detyruar, përveçse në rastet e ekzekutimit të një vendimi gjyqësor…", thuhet në letër. Më tej, duke iu drejtuar kryetarit të Kuvendit, Sindikata e konsideron si dënim me ligj faktin që qeveria dhe Parlamenti kërkojnë që ata të bëjnë punë të detyruar, për shkak se kanë mbushur moshën 55 vjeç dhe kanë 30 vite karrierë në Polici.