Mesatarja në mësuesi sipas VKM, fakultetet e UT: Mos na përfshini

Janë një listë programesh studimi në Universitetin e Tiranës, që jo medoemos të çojnë drejt mësuesisë. E tillë, për shembull, mund të jetë Gjuha Ruse, që rrezikon të zhduket si profil për faktin që asnjë aplikant nuk plotëson dot pragun e notës mesatare të vendosur nga Këshilli i Ministrave në kuadër të rritjes së cilësisë së mësuesve që dalin nga universitetet. E nisur përpara tri vitesh me 7, nota e diferencuar këtë vit pritet të shkojë 8. Me këtë gjë, nuk pajtohen tri fakultete në Universitetin e Tiranës, që shumicën e degëve e ofrojnë në profilet e mësuesisë dhe penalizohen pikërisht për shkak të pragut të VKM- së. Kështu, ata kanë vendosur t’i drejtojnë me një kërkesë Ministrisë së Arsimit, që përpara se të bëjë fakt të kryer vendimin për notën mesatare të përjashtojnë degët, që nuk orientojnë drejt mësuesisë. “Në relacionet me argumentet përkatëse të paraqitura nga Fakulteti i Shkencave të Natyrës, Fakulteti i Gjuhëve të Huaja dhe Fakulteti i Historisë dhe Filologjisë, Senati Akademik i UT në mbledhjen e datës 30.04.2020, vendosi të përcjellë në vëmendje të Ministrisë së Arsimit, Sportit dhe Rinisë, në kuadër të përgatitjes së projektvendimit të Këshillit të Ministrave për kriterin e notës mesatare në pranimet në programet e studimit të ciklit të parë të studimeve, për vitin akademik 2020- 2021, mospërfshirjen e programeve të studimit të ciklit të parë bachelor, që zhvillohen në Universitetin e Tiranës, me kriterin e notës mesatare të diferencuar, pasi programet e studimit të ciklit të parë bachelor, që zhvillohen në Universitetin e Tiranës, nuk janë në fushën e mësuesisë”, citohet në vendimin e Senatit Akademik, përcjellë ministrisë. Një kërkesë e tillë i është parashtruar që vitin e kaluar nga Fakulteti i Gjuhëve të Huaja. Sakaq, Këshilli i Ministrave nuk ka ende një vendim për pragun minimal të studentëve, të cilët aplikojnë për profilet e mësuesisë.