Thaçi: Kurti ka uzurpuar zyrën e Kryeministrit, po sillet si i paligjshëm
Megjithëse Kryeministrit në detyrë, Albin Kurti, i lejohet të qëndrojë në zyrën e tij të paktën deri më 29 maj, kur Gjykata Kushtetuese të shpallë vendimin e saj se çfarë do të ndodhë me nominimin e Avdullah Hotit për Kryeministër nga Hashim Thaçi, Presidenti i Kosovës e ka cilësuar atë një uzurpator të Kryeministrisë. Sipas Thaçit, Kryeministri në detyrë, Albin Kurti, po sillet si njeri i jashtëligjshëm dhe ka uzurpuar zyrën e Kryeministrit edhe pas dy shkeljeve kushtetuese që ka bërë. Thaçi ka thënë se aktorët në vend duhet të fokusohen në respektim të plotë të Kushtetutës. “Ajo çka unë mendoj është që ne të gjithë duhet të fokusohemi në respektimin e plotë të kushtetutshmërisë dhe ligjshmërisë. Për fat të keq, kemi një njeri që e ka uzurpuar zyrën e Kryeministrit edhe pas dy shkeljeve të rënda kushtetuese po paraqitet dhe po sillet si njeri i paligjshëm në skenën politike”, tha Presidenti Thaçi të hënën. Ai shtoi se “Të gjithë të punojmë që të respektohet vendimi i Gjykatës Kushtetuese, që pritet të dalë në ditët e ardhshme, siç janë deklaruar ata, në asnjë formë të mos pretendojë dikush që të bëjë ndonjë presion. Prandaj, ne duhet të presim vendimin e Gjykatës dhe pastaj t’i japim opinionet tona dhe qëndrimet”. Thaçi kujtoi se ai edhe më parë i ka respektuar vendimet që kanë dalë nga kjo Gjykatë, duke shfaqur një sfidë për Lëvizjen Vetëvendosje, e cila ka thënë se do të pranojë vetëm një vendim që është në përputhje me Kushtetutën dhe ka akuzuar Thaçin se po i bën presion Gjykatës. Po ashtu, Thaçi ka akuzuar VV- në se po bën presion në
Kushtetuese. Ndërsa Gjykata Kushtetuese është ankuar për të dyja palët. “Unë si President do të vazhdoj të respektoj gjithë mandatin tim që del nga Kushtetuta. Ne duhet të mësohemi që të respektojmë institucionet e pavarura, që dalin përtej kornizave të interesit ditor politik apo egos personale të çdokujt... Ftesa ime për të gjithë është respektim i vendimit të Gjykatës”, shtoi Thaçi. Ndërkohë, Kryeministri në detyrë, Albin Kurti, ka shkruar për dymujorin e rrëzimit të tij me mocion mosbesimi në Kuvend, se nuk ka ngërç politik në vend dhe se situata zgjidhet me mbajtjen e zgjedhjeve. Gjykata Kushtetuese pritet të dalë me aktgjykim rreth çështjes së mandatarit për formimin e qeverisë, ndërkohë që Kurti tha: “Zgjedhje do të ketë në qershor në Islandë, Francë dhe Serbi, kurse në korrik në Maqedoninë e Veriut, Spanjë dhe Kroaci. Duhet të kemi zgjedhje edhe në Kosovë e aso lokale në Podujevë. Madje, mundet edhe njëkohësisht”.