“Shembja e Teatrit, porosi e lobit serb”, Meta tregon SMS e diplomatit për Ramën: Nga sot do jem si President danez
PRESIDENTI NXJERR LETRAT E AKUZON FORT SHBA DHE BE: E VERTETA E PLANIT ME 14 PIKA DHE TERHEQJA NGA “NEGOCIMI” MES PALEVE POLITIKE
Një ditë pasi Gjykata vendosi të lërë në fuqi pezullimin e anëtarit të Kolegjit të Posaçëm të Apelimit, Luan Daci, është zbardhur edhe dosja hetimore që hedh dritë për gjithë procesin, nga shprehja e interesit për t’u bërë pjesë e kësaj trupe, tek intervista para Komisionit Ad Hoc në Kuvend, e deri te nisja e hetimeve të SPAK.
Në dokumentet zyrtare të siguruara nga “News 24” zbardhet hap pas hapi çdo detaj nga hetimet e SPAK, ku hidhet dritë mbi faktin penal që rëndon ndaj Dacit, pezullimi i të cilit tashmë e ka ulur ndjeshëm besueshmërinë tek institucioni i vetingut, i cili vendos për fatin e njerëzve të drejtësisë. Në bazë të hetimeve të kryera nga SPAK rezulton që Daci të ketë gënjyer edhe në CV e dërguar tek Avokati i Popullit, edhe në intervistën para Komisionit Parlamentar AD Hoc.
APLIKIMI PËR NË KPA
Me vendimin e Kuvendit të Republikës së Shqipërisë, nr. 82/ 2017, datë 10 qershor 2017, botuar në Fletoren Zyrtare, shtetasi Luan Daci është zgjedhur gjyqtar në Kolegjin e Posaçëm të Apelimit. Më datë 3 shkurt 2017, Luan Daci ka paraqitur kërkesë drejtuar institucionit të Avokatit të Popullit dhe ka aplikuar për t’u emëruar në vendin vakant: gjyqtar i Kolegjit të Apelimit; anëtar i Komisionit të Pavarur të Kualifikimit; Komisioner Publik. Kjo kërkesë për aplikim është paraqitur në dy kopje, një kopje në gjuhën shqipe dhe një në gjuhën angleze të nënshkruara prej tij. Në dokumentacionin bashkëlidhur kërkesës për aplikim, aplikuesi ka paraqitur edhe një CV, në të cilën, midis së tjerave, është përshkruar se ka ushtruar kurse në Shkollën e Magjistraturës në periudhën 1995- 1996 dhe më pas është titulluar avokat. Në CV- në e paraqitur, Luan Daci nuk ka përshkruar faktin se ka ushtruar funksionin e gjyqtarit në Gjykatën e Tiranës. Në seancën dëgjimore të datës 2 qershor 2017, të zhvilluar nga Komisioni Ad Hoc i Kuvendit me gjashtë anëtarë, për përzgjedhjen e kandidatëve për krijimin e institucioneve të rivlerësimit, Luan Daci është pyetur nëse ka punuar para vitit 2000 dhe ai është përgjigjur se ka punuar gjyqtar në Gjykatën e Rrethit Gjyqësor Tiranë. Pyetjes së komisionit se sa vjet ka punuar si gjyqtar dhe pse është larguar nga funksioni, Luan Daci është përgjigjur : “Kam filluar në shtator të 1993. Fillimisht si ndihmësgjyqtar, kur kemi dhënë diplomën përpara komisionit shtetëror, dy ditë pas dhënies së diplomës, jam emëruar gjyqtar në Gjykatën e Tiranës, madje jam emëruar dhe zëvendëskryetar… Deri në 24 dhjetor 1997, unë kam qenë gjyqtar në Gjykatën e Tiranës”. Ndërsa pyetjes tjetër nga anëtari i Komisionit nëse në vitin 1997 është larguar, ka ikur apo e kanë hequr, Daci i është përgjigjur: “Unë kam ikur me dorëheqje, sepse nuk na lejuan të regjistroheshim”.
KALLËZIMI PENAL DHE HETIMI NGA SPAK
Më datë 17 janar 2020, në Prokurorinë e Posaçme është paraqitur një kallëzim penal ndaj Luan Dacit. Sipas kallëzuesit, në dokumentacionin zyrtar të marrë nga Kuvendi, rezulton se Luan Daci ka bërë një kërkesë drejtuar institucionit të Avokatit të Popullit me objekt: “Aplikimin, emërimin e kërkuesit në vende vakante të shpallura në bazë të ligjit 84/ 2016, në faqen e dytë të së cilës ka deklaruar se ‘ ndaj meje nuk është marrë masa disiplinore e largimit nga puna, ose ndonjë masë tjetër disiplinore që është ende në fuqi, sipas legjislacionit në momentin e aplikimit’. Ky deklarim që është bërë nga Luan Daci, në një dokument zyrtar drejtuar Avokatit të Popullit, sipas kallëzuesit, provohet të jetë i pavërtetë, pasi me vendimin nr. 6 datë 24.12.1997 të Këshillit të Lartë të Drejtësisë, ai është shkarkuar nga detyra për shkelje të ligjit dhe paaftësi në detyrë. Prokuroria e Posaçme kundër Korrupsionit dhe Krimit të Organizuar mbi bazën e kallëzimit penal nr. 36, datë 27 janar 2020, regjistroi procedimin penal për veprën penale të ‘ falsifikimit të dokumenteve’. Kallëzimi penal i depozituar kundër Luan Dacit ka pasur të bashkëlidhur dokumentacionin e marrë nga Kuvendi i Shqipërisë, ku përfshihej dosja personale e këtij shtetasi, paraqitur prej tij pranë zyrës së Avokatit të Popullit, kopje e procesverbalit të seancës dëgjimore të Luan Dacit në Komisionin Ad Hoc; shkresë marrë nga Këshilli i Lartë Gjyqësor, ku përfshihej edhe vendimi nr. 6, datë 24 dhjetor 1997, i Këshillit të Lartë të Drejtësisë; procesverbal i mbledhjes së
Këshillit të Lartë të Drejtësisë, datë 18 nëntor 2016, kopje e kërkesës së Luan Daci, datë 14 nëntor 2016. Më 28 janar 2020, SPAK kërkoi nga Kuvendi të dhëna në lidhje me shtetasin Luan Daci. Dokumentacioni iu vu në dispozicion me shkresën nr. 359, datë 30 janar 2020. Nga ky dokumentacion rezultoi: Dosja personale e Luan Dacit, paraqitur pranë Avokatit të Popullit, në të cilën gjendej ndër të tjera edhe kërkesa e tij për t’u emëruar në vendet vakante të institucioneve të rivlerësimit, ku ai paraqet përvojën e tij si jurist, por edhe mohon lidhjet me partitë politike në 10 vitet e fundit si dhe ish- Sigurimin e Shtetit gjatë komunizmit.
REAGIMI I GJYQTARIT
Në përgjigjen për SPAK, Daci ka ndryshuar qëndrim, duke mohuar që të ketë falsifikim në dokumentet që ai ka dorëzuar në momentin kur ka aplikuar për pozicionin e gjyqtarit të KPA. “Unë, si aplikues për emërim, nuk kam paraqitur dhe nuk kam bërë asnjë formular të falsifikuar, qoftë nga ana ime, qoftë nga institucionet nga ku unë kam dokumentet. Kallëzuesi konteston CV, kjo CV që unë kam dorëzuar tek Avokati i Popullit me procesverbal nuk ka asnjë rrethanë apo fakt të rremë dhe asnjë dokument të falsifikuar. Lidhur me pretendimin e kallëzuesit për masën disiplinore të shkarkimit nga detyra, dua të sqaroj se nuk është e vërtetë që unë kam pasur detyrim ligjor, e formalizuar me ndonjë formular për të dhënë përgjigje për shkaqet e largimit të personit tim në 1997”, ka thënë Daci.