Qarkullim i lirë dhe lëvizje pa orare, Rama: normalitet pas 1 qershorit
Kreu i PD: Situata e bujqësisë është më keq sesa kritike
Kryetari i Partisë Demokratike, Lulzim Basha, akuzoi dje, nga Rrogozhina, Kryeministrin Rama se ka lënë pa mbështetje financiare fermerët dhe tregtarët ambulantë.
Kreu i selisë blu udhëtoi dje në Bashkinë e Rrogozhinës, ku u takua me dhjetëra tregtarë ambulantë, që shesin produktet e tyre me tezga në krahë rrugës kryesore. Sipas Bashës, Kryeministri Rama nuk mendon për qytetarët e thjeshtë, por u vjen në ndihmë vetëm 5 personave, që, sipas kryedemokratit, janë oligarkë. "Sot, në Shqipëri nuk mbështetet punëtori, nuk mbështetet njeriu i punës, nuk mbështetet prodhimi, mbështetën kriminelët, mbështetem hajdutët, mbështetën 5 oligarkë, e gjithë Shqipëria punon për 5 oligarkë. Kjo situatë do të marrë fund dhe duhet të marrë fund një orë e më parë. Ky është realiteti këtu nga tregu i Rrogozhinës. Tani do të shkoj te disa prej fermerëve të Rrogozhinës. Ky është realiteti i vërtetë i Shqipërisë reale. Kjo është Shqipëria reale, ndërsa shfaqjet me regji qendrore janë një fantazi e pështirë, një gënjeshtër e madhe, e cila duhet dhe do të marrë fund një orë e më parë", tha Basha. Kryetari i selisë blu e përforcoi akuzën e tij duke kujtuar shembjen e Teatrit dhe nismën e qeverisë për të ndërtuar një Teatër të ri, i cili, sipas projektit të privatit, kushton 30 milionë euro, në një kohë që sipas Bashës Shqipëria po përballet me krizën e shkaktuar nga tërmeti i 26 nëntorit dhe pandemisë së koronavirusit. "Vetëm te Teatri Kombëtar duan të harxhojnë 30 milionë euro nga taksat tuaja, me të cilat mund të kishim mbyllur komplet kanalizimet e fshatrave të Shqipërisë, mund të kishim mbyllur komplet kanalizimet e autostradës Tiranë- Durrës, ku janë edhe taksapaguesit më të mëdhenjtë, janë bizneset më të mëdha të cilët janë edhe kontribuuesit më të mëdhenj, të cilët qelben nga mungesa e infrastrukturës; mund të ndihmonin mijëra familje në shtrëngesë të madhe në këto kohë të Covid- it, të cilat i kanë zhvatur edhe nga qindarkat e fundit. Dhe në vend të tyre e kanë mendjen vetëm të zhvatin dhe të grabisin. Ky është e keqja e Shqipërisë, është e keqja e këtyre njerëzve, është e keqja e ekonomisë", vijoi Basha.
SHQETËSIMET E QYTETARËVE
Gjatë bashkëbisedimet të djeshëm, shqetësimet e qytetarëve të Rrogozhinës ishin të shumta. Pensionistët kishin shqetësime nga më baziket. Një prej tyre ankohej se nuk kishte para as për të blerë ilaçet. "Ilaçet i kam marrë me listë te farmacia. Edhe bukën e kam marrë borxh, me listë, se me 80 mijë lekë pension kooperative, unë s'e kaloj dot. Turp është ta themi në çfarë situate jemi", tha një pensioniste, e cila, gjatë bashkëbisedimit me Bashën, shiste disa prodhime të bahçes. Ndërsa një grua, e cila fati e donte që të bënte edhe gruan, edhe burrin e shtëpisë, akuzoi institucionet shtetërore se i kanë shpërndarë ndihmat në mënyrë preferenciale. "Asgjë nuk më kanë dhënë. Ushqimi ka shkuar nëpër vila, aty ku ka vila. Tallen me ne. Ku shkojnë këto taksat tona? Unë i përgjigjem shtetit me drita, me ujë, por asnjë lloj ndihme, asnjë lloj ushqimi", tha nëna e dy fëmijëve. Të shumtë ishin edhe ata, të cilët ankoheshin për uljen e xhiros ditore. Madje, ata u shprehën se detyroheshin të rrinin edhe për 10 apo 15 mijë lekë të vjetra në javë. "Shitjet në treg kanë rënë gjysmë për gjysmë. Është krizë e thellë, e hedhim prodhimin që nuk shitet. Asnjë ndihmë nuk kemi marrë", u shpreh një tregtar gjatë bashkëbisedimit me Bashën. Në përfundim të turit të takimeve, kreu i PDsë, Lulzim Basha, përmes një postimi në "Facebook", akuzoi kreun e qeverisë se do ta mbysë situatën reale përmes propagandës. "Propaganda nuk e fsheh dot dështimin e Edi Ramës, përgjegjësinë dhe sjelljen kriminale të tij", shkroi Basha.