Vendimi, seancat gjyqësore me dyer të mbyllura

Dje , VKM për ndryshimet në aktin normativ si pasojë e COVID- 19

Në kushtet e pandemisë së COVID- 19 qeveria ka vendosur gjatë mbledhjes së djeshme të ndryshojë aktin normativ të masave në gjykata. Kështu, dje është vendosur që të gjitha gjyqet të zhvillohen me dyer të mbyllura. “Gjatë kohëzgjatjes së gjendjes së epidemisë së shkaktuar nga COVID- 19, gjykatat zhvillojnë seancat gjyqësore në çështjet administrative, civile dhe penale, duke zbatuar masat organizative specifike për zhvillimin e proceseve gjyqësore, të nevojshme për të shmangur grumbullimet në ambientet e gjykatave dhe brenda sallave gjyqësore, sipas rregullave që miratohen në përputhje me parashikimet e pikës 4, të nenit 3, të këtij akti normativ”, thuhet në vendim. Më tej, vendimi vazhdon me kufizimin e hyrjes së publikut në ambientet e gjykatës, duke garantuar zbatimin e rregullave të vendosura për këtë qëllim, si dhe zhvillimin me dyer të mbyllura të të gjitha seancave gjyqësore publike. “Pjesëmarrja e palëve, ndërhyrësit kryesorë, ndërhyrësit dytësorë, personit të tretë ose përfaqësuesve të tyre, prokurorit, të pandehurit, të paraburgosurit, avokatit mbrojtës, viktimës, viktimës akuzuese, paditësit, të paditurit civil, avokatit të shtetit, dëshmitarëve, ekspertëve, përkthyesve, si dhe çdo pjesëmarrësi tjetër të përfshirë ose të interesuar, në të gjitha seancat përgatitore/ gjyqësore sigurohet atje ku është e mundur dhe vetëm pasi palët kanë dhënë pëlqimin brenda një afati të caktuar nga gjykata, nëpërmjet ndërlidhjes audiovizive në distancë, duke përdorur programe kompjuterike të përshtatshme për këtë qëllim. Mënyra e ndërlidhjes në distancë duhet të sigurojë, në çdo rast, shikueshmërinë e ndërsjellë të personave të pranishëm në të dyja vendet e ndërlidhura dhe mundësinë e dëgjimit nga të gjitha palët”, thuhet në VKM. Disa ditë më parë, Ministria e Drejtësisë i propozoi Këshillit të Ministrave disa ndryshime në Aktin Normativ në kuadër të masave për parandalimin e COVID- 19. Propozohej që gjykatat në vend të zhvillojnë seancat gjyqësore duke zbatuar masat organizative specifike për zhvillimin e proceseve gjyqësore, të nevojshme për të shmangur grumbullimet në ambientet e gjykatave dhe brenda sallave gjyqësore në përputhje me rregullat e miratuara nga Këshilli i Lartë Gjyqësor si dhe organet e administrimit gjyqësor të çdo gjykate. Po ashtu, gjykata mund të vendosë që pjesëmarrja e palëve, në të gjitha seancat gjyqësore, të sigurohet nëpërmjet ndërlidhjes audiovizive në distancë.