Meta dekoron Vasil Laçin: Çdo tirani kërkon qëndresë
"Çdo formë tiranie kërkon qëndresë, reagim individual, por edhe kombëtar"
Presidenti i vendit, Ilir Meta, dekoroi dje "Heroin e Popullit" Vasil Laçi, me "Dekoratën e Flamurit Kombëtar", në 79- vjetorin e rënies së tij, duke dhënë mesazhe që lidhen me situatat politike në vend.
Teksa ka kujtuar se "atentati i tij kundër uzurpatorit të fronit të Shqipërisë ishte demonstrimi më kuptimplotë patriotik dhe atdhetar kundër pushtimit fashist dhe dhunimit të sovranitetit shtetëror dhe kombëtar", Presidenti Meta theksoi se "çdo formë tiranie kërkon qëndresë, reagim individual, por edhe kombëtar". Sipas kreut të shtetit, liria duhet ruajtur dita- ditës ndaj çdo forme diktature apo tiranie, ndaj çdo regjimi të çdo kohe që shtyp lirinë e fjalës, të mendimit dhe të të drejtave themeltare për të jetuar një jetë të denjë, sovrane dhe me integritet. Dekorata vlerësuese për "Heroin e Popullit:, Vasil Laçi ( pas vdekjes) ka këtë motivacion: "Atdhetarit antifashist, që me aktin e tij heroik dhe vetëflijues u tregoi të gjithë shqiptarëve e veçanërisht rinisë se rruga drejt lirisë dhe çlirimit të atdheut kalonte vetëm përmes fuqizimit të rezistencës së paepur ndaj pushtuesve dhe gatishmërisë edhe për sakrificën më sublime. Atentati i tij kundër uzurpatorit të fronit të Shqipërisë ishte demonstrimi më kuptimplotë patriotik dhe atdhetar kundër pushtimit fashist dhe dhunimit të sovranitetit shtetëror dhe kombëtar". Gjatë fjalës së tij para të pranishmëve, Meta tha se "madhështia e vërtetë e gjestit të tij është se ai u mëson brezave edhe sot që një njeri i vetëm mund të kontribuojë për të dhënë një mesazh të madh dhe frymëzues. Se çdo individ i thjeshtë mund të bëjë pjesën e tij në luftën kundër pushtimit dhe çdolloj tiranie". Ai e cilësoi Vasil Laçin "një shqiptar zemërluan që tronditi një nga perandoritë më të mëdha të kohës". "Vasil Laçi mbetet hero edhe i ditëve të sotme. Duke u kujtuar brezave se liria nuk dhurohet, por fitohet. Se çdo formë tiranie kërkon qëndresë, reagim individual, por edhe kombëtar. Një popull që harron të kaluarën, nuk e gjen dot rrugën për të ardhmen e tij për liri", u shpreh kreu i shtetit. Sipas tij, shqiptarët nuk do lejojnë t'u shtypen të drejtat dhe liritë. "Ne nderojmë e krenohemi me të gjithë heronjtë tanë, por edhe me njerëzit e thjeshtë të mrekullueshëm, trima e patriotë që ka Shqipëria, të cilët, në mbrojtje të lirisë, demokracisë dhe të drejtave të tyre, nuk do lejojnë kurrë të shtypen e dhunohen më nga asnjë tirani", tha Meta.