Parku fotovoltaik, Rama: Faqe e re për energjinë diellore
“HEC- i i Skavicës do të ndërtohet 100% nga buxheti i shtetit”
Kryeministri Rama vlerësoi nisjen e prodhimit të energjisë elektrike përmes burimeve të pastra.
“Siguria energjetike dhe diversifikimi i burimeve të energjisë janë një prioritet kombëtar, që sot fuqizohet me hapjen e faqes së re të energjisë diellore, në finalizimin e ankandit ndërkombëtar për parkun fotovoltaik të Karavastasë, me shpalljen e kompanisë fituese dhe hapjen e rrugës për një investim të konsiderueshëm për ekonominë e vendit”, tha dje Kryeministri. Rama tha se “kemi një investim i huaj mbi 100 milionë euro që nuk është thjesht i rëndësishëm në vlerë, por për faktin se do të bëhet nga një kompani me prestigj të madh ndërkombëtar dhe nga hyrja në ekonominë shqiptare e një aktori të rëndësishëm ekonomik, që vjen nga Franca”. “Të gjitha këto bashkë e bëjnë këtë një ditë shumë pozitive për Shqipërinë, qeverinë dhe natyrisht edhe për ecurinë e progresit në sistemin tonë energjetik. E dimë shumë mirë që jetojmë në një kohë kur gjithmonë e më shumë kërkohet diversifikimi i burimeve të energjisë, në një botë që konsumon çdo sekondë 1100 fuçi naftë dhe 220 tonë qymyr. Të gjitha këto janë burime të shterueshme, ndërkohë që tanimë edhe këtë e kemi mësuar se është botërisht e njohur”, tha Rama. Kryeministri theksoi se “duke qenë një vend i bekuar me 95% të energjisë së rinovueshme si pothuajse asnjë vend tjetër në Europë falë rezerva të mëdha hidrike, ne jemi plotësisht të vetëdijshëm që komponenti tjetër i munguar është dielli në prodhimin e energjisë”. Rama tha se “ky është një potencial i jashtëzakonshëm për ne për të siguruar një zhvillim të qëndrueshëm, ndaj është më urgjente sot që Shqipëria të diversifikojë dhe investojë në energjinë që prodhohet nga dielli”. Kryeministri theksoi se Shqipëria ka 300 ditë diell në shumicën e territorit, ose 2400 orë diell.
HEC Kryeministri Edi Rama deklaroi dje se “HEC- i i Skavicës do të ndërtohet 100% nga shteti”. “Shumë shpejt do të dalim në një proces tjetër të menduar dhe të vonuar me më shumë dekada, sesa vetë kjo periudhë e 30 viteve: projektimi dhe ndërtimi i HECit të Skavicës”, tha Rama. Kryeministri theksoi se “ky ka qenë objektiv historik i të gjitha qeverive shqiptare, edhe atyre para viteve ’ 90. Një objekt strategjikisht, absolutisht i domosdoshëm, i vështirë e i komplikuar. Ndaj qeveritë e kanë pasur në plan, por asnjëherë nuk e kanë shtyrë procesin deri në fund”. “Ne jemi përpjekur të gjejmë aktorët e duhur, që të mund të investoheshin për këtë projekt, por tanimë kemi vendosur ta ndërtojmë me forcat tona dhe do ta ndërtojmë Skavicën 100% nga shteti. Do të jetë një vepër e vështirë, por do të jetë patjetër një vepër që do të transformojë rrënjësisht sistemin, duke garantuar optimizimin e gjithë kaskadës”, tha ai. Kryeministri theksoi se “ky është elementi i munguar i projektit origjinal të kaskadës së Drinit dhe do të jetë edhe fundi i derdhjes së ujit kur ka me tepri dhe përmbytjeve që pasojnë si rezultat i derdhjes”.