Rama: Kthehemi në normalitet nga 1 qershori
Të mbyllura aktivitetet sportive e kulturore me spektatorë, transporti publik, dasmat e funeralet
Edhe pse në dy ditët e fundit ka pasur një shpërthim të rasteve me COVID- 19, Kryeministri Rama bëri me dije se fillimi i muajit qershor do të sjellë me vete edhe rikthimin në normalitet.
Duke theksuar se edhe kjo fundjavë që po afron do të jetë si ato pararendëse, kreu i qeverisë deklaroi se normaliteti i ri pas 1 qershorit nuk do të jetë i njëjtë me atë të ditëve para pandemisë. Por edhe pse pjesa më madhe e aktiviteteve do të jenë të hapura dhe qarkullimi do të jetë i lirë, Rama tha se për transportin publik, aktivitetet sportive me spektatorë, dasmat apo ceremonitë mortore do duhet të pritet për një tjetër datë më vonë. "Kjo do të jetë java e fundit e zonave me ngjyra, e zonave të kuqe. Kjo javë do të jetë e fundit me ndalim kalimi përtej kufirit të çdo zone të kuqe. Detajet të premten, kur të dalë urdhri zyrtar i autoriteteve shëndetësore. Kjo është java e fundit e masave të mbetura të lëvizjes. Me përjashtim të aktiviteteve kulturore dhe sportive pa spektatorë, dasma dhe funerale ku nuk do mblidhen qindra njerëz, transporti publik dhe plazhet me korniza sigurie, gjithçka tjetër do të jetë e hapur", tha Rama. Gjithashtu, kreu i qeverisë deklaroi se shumë shpejt do të prezantohet një plan i përgjithshëm i rimëkëmbjes ekonomike. Sipas Ramës, një rol shumë të fortë në këtë ringritje të ekonomisë pas goditjes që mori nga pandemia, do të luajë edhe ringritja e lagjeve dhe zonave që u dëmtuan nga tërmeti. "Shumë shpejt do të prezantojmë planin e përgjithshëm të rimëkëmbjes ekonomike, që jo vetëm të zhdukim pasojat e kësaj kohe dreqi, por të dalim edhe më të fortë nga kjo vuajte kolektive. Do të investohemi me të gjitha energjitë tona dhe qysh prej fillimit të qershorit, do të rihapen kantieret e ndërtimit dhe deri në fund të vitit shumë njerëz do të hyjnë në shtëpi të reja. Do të hapen kantiere për lagje të reja. Do të realizojmë edhe një plan investimesh, që do të injektojë shumë fuqi në ekonominë e vendit. Do të kthejmë frymëmarrjen e organizmit të këtij vendi që është goditur fort, por nuk është rrëzuar", u shpreh ndër të tjera Kryeministri Rama gjatë një komunikimi në rrjetet sociale.