Aleanca në Lezhë, Budina: Pushteti tentoi të vrasë artistët
Publicisti: Kjo është një protestë kundrejt një sistemi politik që ka degraduar në dhunë
“Në politikën e Shqipërisë së ardhshme, atë të fëmijëve tanë, ne duam një frymë qytetare. Kjo, që të mos detyrohemi e ta braktisim vendin tonë, por ta lulëzojmë atë”.
Regjisori dhe aktori Edmond Budina, i gjendur në Lezhë bashkë me anëtarët e tjerë të Aleancës për Mbrojtjen e Teatrit, përpiqet të sensibilizojë qytetarët për politikat e qeverisë aktuale, që sipas tij po bëhen shkatërrimi i kujtesës qytetare. Kjo për ta është ndalesa e katërt dhe duket se njerëzit po reagojnë pozitivisht ndaj thirrjeve të artistëve. Janë me mijëra shqiptarë, që si rrallëherë po thonë fjalën e tyre, duke firmosur peticionin për rindërtimin e Teatrit Kombëtar ashtu siç ishte dhe në të njëjtin truall. Ndërsa Kryeministri i vendit i cilëson anëtarët e Aleancës si të njëjtët persona që kundërshtojnë gjithmonë ndryshimet që qeveria bën në emër të zhvillimit, duket se njerëzit e artit dhe të kulturës e mendojnë ndryshe. Publicisti dhe botuesi Frano Kulli thotë se protesta e Aleancës është një nga shërbimet më të mira që mund t’u bëhet elementëve demokratikë. “Kjo është një protestë në emër të të drejtave themelore të njeriut, kundrejt një sistemi politik që sot më shumë ka degraduar në dhunë… Dhuna ka vepruar mbi trupat e këtyre artistëve, që sot vazhdojnë rezistencën e tyre”, shtoi më tej Kulli. Regjisori Robert Budina ndau me të pranishmit përjetimin e mëngjesit të 17 majit, kur godina e Teatrit Kombëtar dhe atij Eksperimental “Kujtim Spahivogli” u shemb. “Arrestuan vetëm artistët dhe qëndresëtarët që kishin ndenjur në Teatrin Kombëtar, për t’ju thënë juve që nëse unë arrestoj artistët, nuk pyes për asnjë nga ju. Dhe nuk mjaftoi kjo, por nën dritën e kamerave, shembja e Teatrit Kombëtar filloi në momentin që ne ishim ende brenda. Pra, ai pushtet tentoi të vriste artistët. Mendojmë dhe gjykojmë që kjo ishte një çështje shumë e rëndë, që i bëri të qartë të gjithë botës se me kë po përplasemi ne”, u shpreh ai. Ndërsa aktorja Adriana Tolka, që prej 2 vitesh e 3 muajsh proteston së bashku me anëtarët e tjerë të Aleancës, theksoi se përtej baltës që politika përpiqet të hedhë mbi ta, kjo rezistencë ka shfaqur vlera të larta morale e qytetare. “Atyre nuk u pëlqen fakti që ky vend ka ende burra e gra me personalitet të fortë, që dinë t’i thonë jo ekzistencës së tyre si skllevër”, tha aktorja. Gjatë protestës, fjalën e mori edhe aktori lezhjan i Teatrit “Migjeni”, Vladimir Doda, i cili e cilësoi Aleancën si një “ishull lirie” për këtë periudhë, ku demokracia është e trazuar. “Ne po mbrojmë lirinë e fjalës, ndërkohë na akuzojnë për vulgaritet. Mirëpo, në këtë moment nuk ka shkallë më të lartë vulgariteti sesa ky pushtet”, u shpreh aktori. Ndërsa aktorja e re, Juli Emiri, solli në vëmendje motivet që e mbajnë në jetë prej 27 muajsh një rezistencë të tillë. “Teksa po vija në Lezhë, sytë më shkuan te një shënim i shkruar poshtë një shtylle, pranë një kambane… “Vëllazëria, drejtësia, liria, e vërteta”. Këto fjalë kaq të thjeshta janë shtyllat që mbajnë në këmbë një shoqëri kaq të shëndoshë. Në këto katër fjalë na ra kambana e alarmit, duke bërë që ne të rezistonim për 2 vjet e 3 muaj”, shtoi më tej ajo.