Vetëvendosje proteston një ditë para vendimit të Kushtetueses
Ambasada e SHBA: Partitë të pranojnë çdo vendim të Gjykatës
Një ditë përpara shpalljes së vendimit të Gjykatës Kushtetuese mbi të ardhmen e qeverisjes në Kosovë, Vetëvendosje mban një protestë, me rregulla të distancës sociale, kundër vendimeve të Presidentit Hashim Thaçi për mandatarin e qeverisë.
Protesta është cilësuar nga opozitarët si një formë presioni ndaj Gjykatës Kushtetuese. Nga ora 17: 00, të enjten, Lëvizja Vetëvendosje ka paralajmëruar se do të mbajë një "provë" proteste në sheshin e Prishtinës, një organizim dyorësh në kohë pandemie, me leje edhe nga Policia e Kosovës. Por ish- partia e Hashim Thaçit, PDK ( tashmë e drejtuar nga Kadri Veseli) dhe LDKja e Isa Mustafës, AAK- ja e Ramush Haradinajt dhe Nisma e Fatmir Limajt, e cilësuan tendencë për të bërë presion ndaj Gjykatës Kushtetuese dhe shkelje të masave për Covid- 19. Thaçi ka zgjedhur për formimin e qeverisë, një emër nga LDK- ja, partia e dytë në zgjedhjet e 6 tetorit të vitit të kaluar, dhe Vetëvendosje e ka cilësuar të padrejtë këtë, si dhe një shkelje të Kushtetutës. Vetëvendosje kërkon zgjedhje të reja pas rrëzimit të saj nga një mocion mosbesimi të ngritur nga LDK, në kohën kur ishin ende partnerë koalicioni. Situata në Kosovë mbetet e paqartë, të paktën deri kur Kushtetuesja të marrë një vendim, nëse vendi do të shkojë drejt zgjedhjeve të reja apo Avdullah Hoti i LDK- së do të vazhdojë me formimin e qeverisë së re. Këtë version të dytë, Vetëvendosje ka deklaruar se nuk ka për ta pranuar. Presidenti i Kosovës, Hashim Thaçi, dhe kreu i LDK- së kanë deklaruar se do ta pranojnë çdo vendim të Gjykatës Kushtetuese. Po ashtu, edhe partitë e tjera, si AAK, të cilat tashmë kanë rënë dakord me Hotin për të qenë pjesë e qeverisë. Ndërsa nga Vetëvendosje thonë se do të pranojnë vetëm atë vendim që do të jetë në përputhje me Kushtetutën. Palët e kundërta kanë akuzuar njëra- tjetrën për presion ndaj Gjykatës Kushtetuese. Nga Gjykata janë ankuar për të dyja palët. Ndërsa disa analistë mendojnë se në Kosovë po bëhet një lloj puçi kundër qeverisë, Ambasada Amerikane ka bërë thirrje për të gjitha palët, që sido që të jetë vendimi i Gjykatës Kushtetuese, ta pranojnë atë. "Ne besojmë se është kyçe për demokracinë kosovare që të gjitha partitë dhe institucionet të respektojnë vendimet e Gjykatës Kushtetuese", thuhet në një reagim.