Refuzon të negociojë me diplomatin e BE- së, vërshojnë kritikat ndaj Thaçit
Presidenti i Kosovës, Hashim Thaçi, i cili deri tani ka qenë në krye të palës së Kosovës në takimet kryesore me ndërkombëtarët për negociatat me Serbinë, ka deklaruar se nuk pranon të negociojë me ndërmjetësimin e BE- së për negociatat KosovëSerbi, Miroslav Lajçak. Ky është sinjali i fundit që ka dërguar Presidenti Thaçi që të shmangë përfshirjen e Bashkimit Europian në negociata për Kosovën. Pas deklaratave të tij të ashpra disa muaj më parë, se BE i ka humbur shumë kohë Kosovës dhe se ndërmjetësi i SHBA ka arritur suksese në pak kohë, një ditë më parë foli edhe një këshilltar i Thaçit, sigurisht duke shfaqur qëndrimin e Presidentit, se nëse negociatat do të liheshin në dorë të BE- së, do të përfundonin si çështja e liberalizmit të vizave, pa zgjidhje dhe "me trajtim racist". Presidenti deklaroi se nuk do të marrë pjesë në negociatat me Serbinë, nëse ato udhëhiqen prej përfaqësuesit të posaçëm të Bashkimit
Europian, Miroslav Lajçak.
BE- ja ka refuzuar t'i komentojë deklaratat e Presidentit Thaçi. "Ne nuk e komentojmë këtë deklaratë të z. Thaçi. Dialogu duhet të vazhdojë sa më shpejt që të jetë e mundshme, sapo situata e shkaktuar nga pandemia e koronavirusit ta mundësojë këtë", ka thënë Peter Stano, zëdhënës i BE- së në një reagim për "Koha. net". Nga Parlamenti Europian, raportuesja për Kosovën, Viola von Cramon, ka shkruar se, "Një lider i përgjegjshëm duhet të flasë me negociatorët ndërkombëtarë, nuk është një zgjedhje personale. Miroslav Lajçak ka dëshmuar se ai është duke punuar për negociata të orientuara drejt rezultatit. Çfarë është më e rëndësishme për Hashim Thaçin".
Sipas "Koha. net", Jeta Krasniqi nga Instituti Demokratik i Kosovës thotë se Kosova nuk e ka luksin t'i refuzojë partnerët strategjikë në procesin e dialogut. "Ajo çfarë ne duhet të kërkojmë janë dy gjëra, që të kemi një kohezion të brendshëm se si t'i qasemi dialogut sa u përket parimeve, vijave të kuqe dhe epilogut të tij. Por, nga ana tjetër, edhe si t'u qasemi partnerëve tanë strategjikë, qoftë BE- së apo SHBA- së dhe të kërkojmë të kemi një koordinim e bashkërendim me ta", tha Krasniqi. Arsyeja kryesore e rrëzimit të qeverisë Kurti ishte heqja e pengesave në dialog, sipas kërkesës së SHBA- së.
Ndërkohë, përfaqësuesi i lartë i Bashkimit Europian për Politikën e Jashtme dhe të Sigurisë, Josep Borrell, ka thënë se Ballkani Perëndimor ( përfshirë Kosovën dhe Serbinë me lehtësim dialogu nga BE), ka të ardhme europiane. Shkrimi i tij është mbështetur nga diplomati gjerman, Boris Ruge, dhe përfaqësuesi i posaçëm për dialogun Kosovë- Serbi nga Bashkimi Europian, Mirosllav Lajçak. "Si BE, ne jemi të përkushtuar t'i shoqërojmë ata në çdo hap të rrugës së tyre. Por, që e ardhmja europiane të bëhet realitet për njerëzit, dialogu i ndërmjetësuar nga BE- ja nuk mund të anashkalohet", ka shkruar Borrell në "Twitter".