Rindërtimi pas tërmetit në Tiranë, sa do përfitojnë banesat e dëmtuara
Në kuadër të masave të marra për përballimin e pasojave të fatkeqësisë natyrore, Bashkia Tiranë, si organ përgjegjës në zbatim të kompetencave të qeverisë, është angazhuar për procesin e rindërtimit në nivel lokal. Për të bërë një ndarje sa më të drejtë, ka hartuar një udhëzues që unifikon procedurën e menaxhimit të aplikimeve në lidhje me grantin për rikonstruksionin e banesave të dëmtuara.
Kështu, udhëzuesi përcakton që shtëpitë individuale ose banesat e të cilëve kanë pësuar dëmtime thelbësore deri në të mëdha, që konsistojnë në çarje të moderuara në strukturë ose çarje të mëdha në mure ndarëse dhe mbushëse, ose dëmtim i mureve ndarëse dhe perimetralë, të përcaktuar nga akt- ekspertiza e thelluar, nuk mund të përfitojnë më shumë se 500 mijë lekë. Banesat me dëmtime të lehta strukturore marrin jo më shumë se 250 mijë lekë, ndërsa shtëpitë që nuk kanë dëmtim strukturor të dukshëm ose të papërfillshëm nuk mund të përfitojnë zhdëmtim më të lartë se shuma 100 mijë lekë. Nga ana tjetër, janë përcaktuar qartë edhe kategoritë që nuk përfitojnë nga granti i qeverisë që ndahet përmes bashkive. Konkretisht, individi ose familja që ka në pronësi më shumë se një banesë, ndonëse mund të jenë të dëmtuara, nuk përfiton. Po ashtu, edhe ndërtesat e paligjshme brenda të njëjtës ndërtesë nuk përfitojnë, pasi dëmi ka ardhur si pasojë e gabimit në projektimin apo ndërtimin e ndërtesës së kryer prej vetë subjektit, që njëkohësisht është edhe pronar.
Aplikimi për të përfituar nga nënprogrami i grantit të rikonstruksionit bëhet me dy faza. Në fazën e parë, aplikantët paraqesin kërkesën e tyre së bashku me dokumentet e kërkuara. Në fazën e dytë të aplikimit, përfshihen vetëm ata/ o individë/ familje që janë përzgjedhur për t'u trajtuar nga ky nënprogram. Me pak fjalë, kushdo që ka dëm të dukshëm në banesë, vlerësuar edhe nga akt- ekspertiza, mund të jetë përfitues potencial nga granti për rindërtim. Pas plotësimit të formularëve dhe dokumentacionit të kërkuar në këtë kre, Njësitë Administrative/ Lagjet përkatëse i përcjellin ato në Bashkinë Tiranë, pranë Drejtorisë së Përgjithshme të Shërbimeve Sociale, e cila realizon procesin e seleksionimit të formularëve. Në varësi të statusit të shkallës së dëmtimeve, aplikimet e klasifikuara merren në shqyrtim për fazën e dytë dhe finale, që përcakton fituesit.