Basha flet si Kryeministër: Në zgjedhjet e ardhshme, Ramën s’e shpëton dot nga largimi asnjë grup kriminal
"Në zgjedhjet e ardhshme, Edi Ramën s'e shpëton nga largimi asnjë grup kriminal. S'ka shans bashkëpunimi me një kufomë politike"
KREU I OPOZITES TREGON PLANIN EKONOMIK DHE KERCENON PER TEATRIN E RI
Kreu i opozitës, Lulzim Basha, foli dje si Kryeministër i ardhshëm duke thënë se ka plan, vizion dhe ambicie për ta fituar betejën me Edi Ramën.
I ftuar në emisionin "Opinion" me Blendi Fevziun, Basha ka hedhur poshtë çdo zë për një marrëveshje aktuale apo paszgjedhore mes tij dhe Kryeministrit Rama.
A ka një marrëveshje të diskutuar apo të nënkuptuar, sy më sy apo me ndërmjetës, mes jush dhe Kryeministrit Rama, për këtë situatë dhe atë post- zgjedhjeve 2021?
Propagandë e lodhur dhe e vjetër. E para punës, ata që e shpërndajnë kanë versione të ndryshme. Të njëjtët njerëz thonë në mëngjes që ka marrëveshje që Rama të bëhet President dhe Meta Kryeministër dhe pasdite thonë që Basha Kryeministër dhe Rama President. Tani të them diçka serioze. Përtej dallaveraxhinjve të vegjël dhe provincialë, që megjithëse u pasuruan, ndërtuan vila, blenë makina e prapëseprapë mbetën provincialë të vegjël, përtej dallaveraxhinjve të Tiranës, ka dy gjëra fondamentale, që s'ka të bëjnë as me ata dhe as me darkat e tyre për të mbajtur në këmbë një kufomë si Edi Rama. E para, nuk ka për të pasur ndryshim të vërtetë pa ndëshkuar Ramën e Veliajn, ministrat e tyre për çdo shkelje ligjore. Rruga mund të mos jetë e shpejtë, por ky është zotimi im personal si kryetar i opozitës dhe nesër drejtues i ardhshëm. Nuk do të ketë as amnisti të fshehur dhe as marrëveshje për këtë. Nuk kam as mllef dhe as diçka personale. Por kam realizimin, që pa ndëshkimin e krimeve, ajo shoqëri i përsërit ato. E dyta, si mund të mendohet që të jemi bashkë? Rama i ka bërë zgjedhjet e veta, paratë e shqiptarëve 2 miliardë euro ua ka dhënë oligarkëve, mbi 700 milionë euro i ka bërë buzëkuq elektoral. Nuk ka komb në Ballkan dhe Europë që i janë rritur taksat më shumë se shqiptarëve në këto 7 vite. Unë kam një tjetër projekt, që është anulimi i këtyre projekteve.
Po citoj Presidentin, që thotë se nuk më ka dëgjuar opozita, ka bërë gabim fatal me largimin nga Parlamenti dhe disa të tjera.
Nuk i bëj unë nder Ramës të merrem sonte me replika me Presidentin. Presidenti ka mendimet e veta. Unë kam qëndrimet e mia. Është në mandatin e tij që të bëjë gjithçka, që të zhbëjë sa është e mundur kapjen e drejtësisë nga qeveria. Unë e kam bërë detyrën time para 4 vitesh. Para 4 vitesh, kur ne fituam betejën, mos harro, për ndryshimin e Kushtetutës sipas Komisionit të Venecias, Edi Rama zhbëri këtë konsensus me këto 6 ligje. Në këtë moment, gjithçka mori fund. E vetmja mënyra për t'iu rikthyer Reformës në Drejtësi është për të zbatuar Kushtetutën, siç u aprovua me 22 korrik.
Jeni penduar për largimin nga Parlamenti?
Në asnjë sekondë nuk jam penduar, sepse, po të mos ishim larguar nga Parlamenti, bota sot nuk do ta shihte siç e sheh këtë për një regjim fasadë që mbulon të vërtetën e një qeverie të falimentuar, të dështuar e të kriminalizuar.
Dukeni sot krejt ndryshe në vullnetin për të hyrë në zgjedhje për t'u përballur. Vjen nga presioni ndërkombëtar, apo vjen nga bindja që ju keni se mund të fitoni zgjedhjet?
Nga vetëdijesimi total i shqiptarëve, por edhe i faktorit ndërkombëtar se ka ardhur koha për një ndryshim dhe një ndryshim të thellë.
"I shtyva që të bënim zgjedhje gjithëpërfshirëse, kam marrë fjalën nga zoti Basha që do hyjnë në zgjedhje, pastaj mbajtën atë qëndrimin ashtu e kështu…", tha kreu i shtetit, Ilir Meta.
Unë s'jam këtu për të komentuar deklaratat e Presidentit, por një gjë është e qartë edhe për Presidentin, edhe për shqiptarët: që Presidenti veproi për të shmangur konfliktin e përplasjen. Bëri shumë mirë që veproi me zhdekretimin e procesit të 30 qershorit, edhe kjo është përtej çdo diskutimi, të gjithë e dimë që KQZ- ja e të gjitha institucionet e tjera ishte nën urdhrat e Ramës. Pretendimi se opozita do hynte në një proces që s'ekzistonte për arsyen se dekreti i Presidentit u injorua tërësisht e kjo është vepër penale nga KQZ- ja. Nuk është e vërtetë që i kisha dhënë premtim Presidentit se do hynim në zgjedhjet e 30 qershorit. Procesi erdhi pas një vendimi të madh që morëm ne, që kishte një dhe vetëm një qëllim: largimin e kësaj qeverie, shpërbërjen e Parlamentit ilegjitim e çuarjen e vendit në zgjedhje të parakohshme.
Ka një perceptim në opinionin publik se Rama po luan me ju e me Metën për xhelozi dhe po ju shkel syrin...
Unë nuk jam nekrofil, kështu që nuk bëhem xheloz për një kufomë politike. Kam besim të madh që Presidenti Meta, i cili ka treguar kurajë në mbrojtjen e Kushtetutës, në veçanti vitin e fundit, që edhe ai nuk ka prirje nekrofilike, por po t'i ketë, është problem i tij.
A ka tendencë të Metës për t'u kthyer si lideri i opozitës pas largimit nga Presidenca?
Presidenti Meta ka një mandat deri në 2022. Kryetari i opozitës jam unë, kandidati për Kryeministër jam unë e me votën e shqiptareve, unë do drejtoj qeverinë e ardhshme. Detyrat e përgjegjësitë janë të ndara.
Po nëse opozita fiton zgjedhjet, a mund të jetë Ilir Meta President i Republikës edhe për një mandat tjetër? Pa dyshim që po. Cilat pika janë të panegociueshme për Reformën Zgjedhore, e cila do të mbyllet brenda 48 orëve?
Asnjë pikë nuk ka kuptim në qoftë se nuk ka vullnet për ta zbatuar atë. Kështu që, fillim e mbarim, pika më e rëndësishme është: do të ketë apo nuk do të ketë qeveri pa Edi Ramën Kryeministër. Në qoftë se nuk ka qeveri pa Edi Ramën Kryeministër, të tjerat janë pesë me hiç, por ne jemi aty për të bërë detyrën tonë, që të paktën kuadri ligjor nesër nën qeverisjen tonë, nën drejtimin tim, të mos kenë gojë dhe të thonë shikoni...
Zoti Basha, a do të futeni në zgjedhje edhe nëse nuk realizohet një qeveri tranzitore?
Ne nuk kemi në dorë asgjë më shumë sesa të shfaqim vullnetin tonë politik, për t'u dhënë shqiptarëve dhe Shqipërisë zgjedhje të lira e të ndershme. Përballë kemi një njeri dhe një grup njerëzish, të cilët e kanë jetike të mbrojnë krimet, korrupsionin, dështimet e tyre gjatë këtyre viteve. Pjesë e kësaj është sabotimi i Reformës Zgjedhore, të cilën u përpoqën ta sabotonin me akte të ndryshme. I fundit ishte ai te Teatri, është sabotimi dhe kapja e Reformës në Drejtësi. Këto janë akte të përkohshme, sepse shumë shpejt dita do të vijë kur kjo qeveri, që tashmë i ka ditët e numëruara, do të përballet me vullnetin popullor dhe nuk do të ketë asnjë forcë, asnjë kriminel, asnjë grup kriminal të përsërisë atë që ndodhi në vitin 2017.
Kjo do të thotë që opozita do të dalë në zgjedhje në të gjitha rrethanat?
Kjo do të thotë që çdokush do ta gjejë veten te programi ynë, tek alternativa jonë, për ta shpëtuar vendin nga kjo e keqe. Çdo ditë më shumë me Edi Ramën është një ditë më e keqe, një familje më shumë zhytet në varfëri, një biznes mbyllet, një kompani nxjerr më shumë të papunë, një student largohet në emigracion. Kësaj duhet t'i japim fund një orë e më parë. Ne kemi planin, unë kam vizionin, kam planin, kam vendosmërinë, kam ambicien, kam përvojën për ta drejtuar këtë betejë dhe ajo që shoh në këto takime, është që të gjithë po thonë: "Rama duhet të largohet një orë e më parë. Ti je shpresa jonë, na mblidh, na bashko të shkojmë drejt ndryshimit", që mezi po e pret çdo shqiptar. Dhe kjo, po ta them me sinqeritetin më të madh, pa fije propagandë, përfshin shumë njerëz, të cilët e cilësojnë veten e tyre si të majtë apo si socialist.
Në lidhje me teatrin, ju nuk do lejoni ndërtimin e teatrit të ri?
Ne do ti qëndrojmë kontratës me aleancën e artistëve. Do çojmë para drejtësisë të gjithë ata që u pëerfshinë në këtë aferë, nga Edi Rama dhe Erion Veliaj. Çdo kompani që do të përfshihet në këtë aferë do të hetohet nga dita zero.