Yuri Kim në zyrën e Ruçit, për Reformën në Drejtësi dhe atë Zgjedhore
Kreu i Kuvendit: Suksesi i Reformës Zgjedhore dhe i Drejtësisë, jetik për ecjen përpara të Shqipërisë
Reforma në Drejtësi dhe Reforma Zgjedhore ishin dy temat e diskutuara në takimin mes Kryeparlamentarit Ruçi dhe ambasadores së SHBA- ve në Tiranë, Yuri Kim, me kërkesë të kësaj të fundit.
Kryediplomatja amerikane në Tiranë ishte në mesditë në Kryesinë e Kuvendit, ku u prit nga Gramoz Ruçi. Në përfundim të takimit, Kuvendi publikoi një njoftim rreth çështjeve të diskutuara. "Kryetari i Kuvendit, Gramoz Ruçi, priti sot, me kërkesën e saj, ambasadoren e SHBA, znj. Yuri Kim. Gjatë takimit u diskutua mbi ecurinë e Reformës Zgjedhore, të Reformës në Drejtësi dhe të procesit të integrimit europian të Shqipërisë, pas momentit historik të vendimit për çeljen e negociatave nga Bashkimi Europian. Suksesi i Reformës Zgjedhore dhe i Reformës në Drejtësi është jetik për ecjen përpara të Shqipërisë, zhvillimin e vendit, konsolidimin e demokracisë dhe suksesin e proceseve integruese", thuhet në njoftimin informues të zyrës së shtypit të Kryeparlamentarit.
DREJTËSIA
Ditët e fundit, ambasadorja amerikane në Tiranë, Yuri Kim, ka shprehur shqetësime lidhur me ecurinë e Reformës në Drejtësi dhe rrezikun e pazareve për ta penguar atë. Pak ditë më parë, Kryeministri Rama ka hedhur poshtë mundësinë e rishikimit apo ndërhyrjes në ligjet e Reformës në Drejtësi, ndërsa u shpreh se çdo përmirësimin që mund të kërkohet, do bëhet në dakordësi të plotë me partnerët ndërkombëtarë. "Dua t'ju kujtoj që Reforma në Drejtësi nuk është një vepër ekskluzive e politikës shqiptare, është një vepër në proces me bashkautorësinë e partnerëve tanë ndërkombëtarë, jemi ne, janë SHBA- ja, është BE- ja dhe deri më sot unë nuk e kam dëgjuar nga bashkautorët se ka vend për të rishikuar Reformën në Drejtësi, sot për sot. Asgjë nuk është e papërmirësueshme në këtë botë.
Perfeksioni nuk ekziston, prandaj jeta është një përpjekje e vazhdueshme në kërkim të perfeksionit dhe siç thotë Salvador Dali, mos u trembni nga perfeksioni se nuk do ta arrini kurrë. Por në këto kushte duhet zbatuar në realitet Reforma në Drejtësi. Pastaj, mbrojtësit e flaktë, apo mbrojtësit e akullt, janë tema të tjera që nuk hyjnë në thelbin e interesit tuaj. Ndaj, përgjigjja ime është jo, nuk ka vend për të riparë Reformën në Drejtësi, sot për sot, përderisa duhet ta zbatojmë. E para dhe e dyta, nëse do ketë vend për të riparë, kjo është diçka që do të diskutohet me bashkautorët", është shprehur Kryeministri.