Konkluzioni se Teatri duhet shembur, Prokuroria thërret tre specialistët
Prokuroria e Tiranës ka thirrur dje për të marrë në pyetje tre specialistët e Institutit të Ndërtimit, që përpiluan aktekspertizën dhe dolën në konkluzionin se godina e Teatrit Kombëtar duhej shembur. Ata ishin denoncuar në organin e akuzës nga artistët që i konsideronin autorë direkt të shembjes së Teatrit pa një aktekspertim fizik të godinës, por janë bazuar në akte ekspertimi të kryera nga kolegët e tyre dy vite më parë. Më shumë se 24 orë pas shembjes së Teatrit Kombëtar, Prokuroria e Tiranës regjistroi procedim penal dhe nisi hetimet për kallëzimin e bërë për ekspertizën e kryer nga inxhinierët apo persona të tjerë të përfshirë. Ndonëse kallëzimi ishte bërë ditën e premte nga Aleanca për Mbrojtjen e Teatrit dhe Teatri Kombëtar u shemb në orët e para të mëngjesit të së dielës, datë 17 maj, organi i akuzës, më 18 maj, njoftoi se kishte regjistruar procedimin penal dhe po kryente hetime. Nëse në përfundim të hetimeve do rezultojë që Aleanca ka pasur të drejtë në lidhje me ekspertizën e kryer, maksimumi inxhinierët apo persona e tjerë do dënohen për “shpërdorim detyrë”, por për Teatrin tashmë është vonë. Sikur procedimi të ishte regjistruar ditën kur u depozitua kallëzimi, mbase Teatri Kombëtar sot do ishte ende në këmbë. Nga ana tjetër, organi i akuzës së kryeqytetit njoftoi se po kryen hetime edhe për dhunën e pretenduar nga kallëzuesit si të ushtruar nga Policia. “Është regjistruar procedim penal, duke u kryer hetime dhe për kallëzimin e bërë nga Aleanca për Mbrojtjen e Teatrit në lidhje me ekspertizën e kryer nga inxhinierët apo persona të tjerë të përfshirë. Nga ana e Prokurorisë po kryhen hetime edhe në lidhje me dhunën e pretenduar nga kallëzuesit, si të ushtruar nga punonjësit e Policisë”, njoftoi zyrtarisht Prokuroria e Tiranës. Aktivistët kanë denoncuar tre inxhinierët, Artur Hasantare, Olsi Nunaj dhe Elbarina Kola.