Ish- i dënuari kapet me pistoleta e "Shotgun"
U arrestua te "Fresku", në çantë i gjendet edhe kokainë
Një 45- vjeçar me precedentë të mëparshëm penal është arrestuar të mërkurën në zonën e "Freskut", në Tiranë, gjatë një operacioni që të organizuar nga "Shqiponjat" dhe oficerët e Antidrogës. Operacioni u zhvillua pas informacioneve të marra në rrugë operative, se ky person lëvizte i armatosur dhe mbante edhe lëndë narkotike. Policia tha dhe se është finalizuar operacioni i koduar "Fresku", gjatë të cilit janë sekuestruar dy pistoleta, një "Shotgun", disa fishekë, si dhe një sasi lënde narkotike, e llojit kokainë. Ndërsa është vënë në pranga Adnand Gaxherri, 45 vjeç. "Në vijim të punës për rritjen e parametrave të sigurisë, si rezultat i kontrolleve të shtuara për kapjen e personave në kërkim dhe atyre që qarkullojnë me armë zjarri me vete, Forcat e Posaçme ' Shqiponjat', në bashkëpunim me
Seksionin për Hetimin e Narkotikëve në DVP Tiranë kanë marrë informacion në rrugë operative se një shtetas në zonën e Freskut qarkullonte në orët e pasdites, duke mbajtur me vete armë zjarri dhe lëndë narkotike. Bazuar në këto informacione është organizuar, zhvilluar dhe finalizuar operacioni policor i koduar ' Fresku', si rezultat i të cilit u bë e mundur kapja dhe arrestimi në flagrancë i shtetasit Adnand Gaxherri, 45 vjeç, banues në Tiranë", tha Policia. Ndërsa shtoi se gjatë operacionit, nga kontrolli fizik në çantën e dorës, këtij shtetasi iu gjet një armë zjarri pistoletë dhe një sasi e vogël lëndë narkotike e dyshuar kokainë. Gjatë kontrollit në banesë, këtij shtetasi iu gjet dhe iu sekuestrua në cilësinë e provës materiale një tjetër armë zjarri pistoletë me fishekë në fole gati për qitje, një armë gjahu "Shotgun" dhe një sasi fishekësh luftarak.